ވަޒީރުންނަށް ރުހުން ދިނުމަށް މިއަދު އޮތީ ތާވަލުކޮށްފައެވެ. 13:30ގައި ޖަލްސާ ބާއްވަން އޮތް ނަމަވެސް ސަރުކާރު މެމްބަރުން މަޖިލިސް ދޮރުތައް ތަޅުލާފައި ހުރުމުން އިދިކޮޅު މެމްބަރުންނަށް ތަޅުމަށް ނުވަދެވޭތީ ޖަލްސާ އަދިވެސް ފެށިފައެއް ނުވެއެވެ.
ބައެއް ވަޒީރުންނަށް ރުހުން ނުދޭން އެމްޑީޕީއާ ދަ ޑިމޮކްރެޓްސް އިން ނިންމުމުން ސަރުކާރުގެ ވަޒީރުންނާއި ނައިބު ވަޒީރުންނާއި ރައީސް އޮފީހުގެ ވަޒީރުންގެ އިތުރުން ސަރުކާރަށް ތާއިދުކުރާ މީހުން ދަނީ މަޖިލީހުގެ ބޭރުގައި މުޒާހަރާކުރަމުންނެވެ.
އެތަނުގައި ހުންނަވާ މީޑިއާ ވާހަކަދައްކަވަމުން އަބްދުއްރަހީމް ވިދާޅުވީ ވަޒީރުންނަށް ރުހުން ނުދިނުމަކީ ބަލއިގަނެވޭނެކަމެއް ނޫންކަމަށާއި އެކަމުން ނެރެވޭނެ ނަތީޖާއެއްވެސް ނޯންނާނެކަމަށެވެ. އަދި ވަޒީރުންނަށް ރުހުން ނުދިނަސް ހަމަ އެ ވަޒީރުން އައްޔަންކުރުމުގެ އިހްތިޔާރު ރައީސް މުއިއްޒަށް އެބައޮތްކަމަށްވެސް އަބްދުއްރަހީމް ވިދާޅުވިއެވެ.
އަބްދުއްރަހީމް ވަނީ އިދިކޮޅަށް މަޖލީހުގައި މިއަދު އޮތް މެޖޯރިޓީއަށްވެސް ފާޑު ވިދާޅުވިއެވެ. އެގޮތުން މަޖލީހުގެ މެޖޯރިޓީ އިދިކޮޅަށް ލިބިފައި ދެން އޮންނާނީ ކުޑަ ދުވަސްކޮޅަކަށް ކަމަށާއި ދެން އަންނަ މަޖިލީހުގައި ސުޕަރް މެޖޯރިޓީ ރައީސް މުއިއްޒުގެ ސަރުކާރުން ނަގާނެކަމަށެވެ.