މި މެސެޖުގައި ހީނާ ވަނީ އޭނާގެ ކެންސަރު ބަލީގެ އަމިއްލަ ތަޖުރިބާ ހިއްސާކޮށްފަ އެވެ.
ހީނާ އަށް ކެންސަރު ބަލި ޖެހިފައިވާ ކަން އެނގުނީ މީގެ ދިހަ މަސް ކުރިންނެވެ. އެއާއިއެކު ހަދާނެގޮތް ހުސްވެ، ކަންބޮޑުވެ، ދެރަވެ މާޔޫސްވި ކަމަށާއި ނަމަވެސް ހެއްދެވި ފަރާތަށް ހުރިހާކަމެއް ވަކީލުކޮށް ފަރުވާއަށް އަވަސްވެގަތް ކަމަށާއި އެކަމަކު އޭރު މިއީ ކިހާވަރެއްގެ ވޭންހުރި ކަމެއްކަން ކުޑަކޮށްވެސް ނޭނގޭ ކަމަށް ހީނާ ބުނެފައިވެ އެވެ.
ކީމޯ އައިވީގެ ކޮންމެ ޑްރޮޕެއް ދިޔައީ ހަށިގަނޑުގެ ދިފާއީ ނިޒާމާއި ހެދިބޮޑުވަމުންދިޔަ ކޮންމެ ސެލްއެއް ނެތިކޮށްލަމުން ކަމަށާއި އޭގެ ނަތީޖާއެއްގެ ގޮތުން ހަށިގަނޑަށް ބޮޑެތި ބަދަލުތައް އައިކަމަށެވެ. އެގޮތުން މުޅި ހަށިގަނޑު އެއްކޮށް ދުޅަވެ ކާއެއްޗެހީގެ ރަހަ ބަދަލުވެ, ނުކެވި، ބޮލުގެ އިސްތަށިތައް ފޭބުމުގެ އިތުރުން ހަށިގަނޑުގެ މަސްތަކާއި ހަށިގަނޑުގެ އެންމެ ކުދި ކަށިތަކުގައި ގަދަޔަށް ރިއްސުން ހިމެނެއެވެ.
މިކަމުގެ ސަބަބުން އަމިއްލަ ނަފްސާމެދު ދެކުނުގޮތް ބަދަލުވެ ސެލްފްކޮންފިޑެންސް މަޑުމަޑުން ދާންފެށި ކަމަށާއި ތިއޭޓަރަށް ވަންނަ ކޮންމެ ފަހަރަކު ވަންނަނީ ވަރަށް ހިތް ނުތަނަވަސްކަންމަތީ ކިޔުނުހާ ހެޔޮ އެއްޗެއް ކިޔައިގެން މައިންބަފައިންނާއި ދަރިންނާއި ލޯބިވާ މީހުން އަދި ފެންނާނެ ކަމުގެ އުއްމީދުގައި ކަމަށް ބުންޏެވެ.
ކީމޯއަށްފަހު ރޭޑިއޭޝަންގައި އެއްމަސްދުވަސް ހޭދަކުރިކަމަށާއި ކޮންމެ ދުވަހަކު ބާރުގަދަ ރޭޑިއޭޝަންއަށް މީހާގެ ހަށިގަނޑު އެކްސްޕޯޒް ކުރަން ފަސޭހަ ނޫން ކަމަށް ހީނާ ބުންޏެވެ.
އެންސްޕާގެ ސީއީއޯގެ މަގާމުގައި މިހާރު ހުންނެވި ކުރީގެ ޓީވީ ޕްރެޒެންޓަރު ހީނާ
ނަމަވެސް އަޒުމަކަށްވީ ވެއްޓޭ ކޮންމެ ފަހަރަކު ކޮޅަށް ތެދުވުން ކަމަށާއި އެގޮތުން ބައެއް ދުވަސްދުވަހު ތެދުވާހާ ހިތްވަރު ނެތަސް އަނެއްދުވަހު މަސައްކަތަށް ނުކުންނަނީ ކަމަށެވެ. ބަލިވިޔަސް ގައިގަ ވަރުނެތަސް ހަރަކާތްތެރިވުން އިތުރު ކުރިކަމަށާއި ބައްޔާމެދު ޕޮޒިޓިވްކޮށް ވިސްނަންފަށައި ނަފްސާނީ ގޮތުން ކުރިމަތިވި ގޮންޖެހުންތަކާއި އެކިކަހަލަ ނެގެޓިވް ހިޔާލުތަކާއި ފިކުރުތަކުން ދުރަށްދިއުމަށް ހިތާ ސިކުނޑިއާ ދެކޮޅަށް މަސައްކަތްކުރި ކަމަށް ވެސް އޭނާ ގެ މެސެޖުގައި ވެއެވެ. ތަހައްމަލް ކުރަމުންދިޔަ އުނދަގޫ ދުވަސްތަކާއި ވަގުތުތައް އަމިއްލައަށް ވަރަށް ބޮޑަށް މެނޭޖްކޮށް ބައްޔާއެކީ އާދައިގެ ދިރިއުޅުމެއް އުޅެވޭތޯ މަސައްކަތް ފެށިކަމަށް ވެސް ވެއެވެ.
ހީނާ އޭނާގެ ތަޖުރިބާ ހިއްސާކުރުމުގެ ބޭނުމަކީ މިބަލި ތަހައްމަލް ކުރަމުންދާ މީހުންގެ ތެރެއިން އެންމެ މީހަކަށް ނަމަވެސް އޭނާގެ ތަޖްރިބާއިން ހިތްވަރު ދިނުމެވެ.
ކެންސަރަކީ ރާއްޖޭގެ ގިނަ ބަޔަކު ތަހަންމަލު ކުރަމުން އަންނަ ނުރައްކާތެރި ބައްޔެކެވެ.
