ރޯދަ މަހު އެއްވެސް އިންތިހާބެއް ނުބޭއްވޭ ގޮތަށް މަޖިލިހަށް ހުށަހެޅި އިސްލާހުގެ ބިލު އަވަސް ކުރުމުގެ ގޮތުން ވަގުތީ ކޮމިޓީއަކަށް ފޮނުވާފައިވާތީ، އެ ކޮމިޓީން ބޭއްވި ދެ ވަނަ ބައްދަލުވުމަށް އީސީގެ އިސް ބޭފުޅުން މިއަދު ވަނީ ހާޒިރު ކޮށްފަ އެވެ.
އެ ކޮމިޓީގައި ފުއާދު ވިދާޅުވީ އެހެން ގައުމުތަކާ ހިލާފަށް ރާއްޖޭގެ އީސީއަށް އިންތިހާބުތަކާ ބެހޭ ކަންކަމުގައި ގޮތް ނިންމުމުގެ ފުރިހަމަ ބާރު ނުލިބޭ ކަމަށެވެ.
ފުއާދު ވިދާޅުވީ އެހެން ގައުމުތަކުގެ އީސީން އިންތިހާބު ބައްވާނެ ތާރީހެއް ކަނޑައެޅުމުން އެ ނިންމުމަށް އެހެން މުއައްސަސާތަކުން އިޖާބަދީ، އެއްބާރުލުން ދޭ ކަމަށެވެ. ނަމަވެސް ރާއްޖޭގައި އެކަން ކުރެވެނީ އެހެން އިދާރާތަކަށް ފަސޭހަ ވާނެތޯ ބެލުމށްފަހުގައި ކަމަށް ފުއާދު ވިދާޅުވި އެވެ.
އެ ކޯމިޓީގައި ވާހަކަ ދައްކަވަމުން އީސީގެ ނައިބު ރައީސް އިސްމާއީލް ހަބީބު ވިދާޅުވީ ގާނޫނަށް ގެނެވޭ އިސްލާހުގެ ތެރެއިން ރޯދައިގެ ފަހުން އިންތިހާބު ބޭއްވުމަށްޓަކައި ދައުލަތުން އީސީއަށް ފޯރުކޮށްދޭން ޖެހޭ ހުރިހާ ވަސީލަތްތަކެއް، ކަމާ ގުޅުން ހުރި މުއައްސަސާތަކުން ފޯރުކޮށްދެން ޖެހޭ ގޮތަށް މާއްދާއެއް ހިމެނުން މުހިއްމު ކަމަށެވެ.
ރައްޔިތުންގެ މަޖިލީހުގެ އިންތިހާބު ބާއްވަން މިހާރު ނިންމާފައި ވަނީ މާޗް 17، ގަ އެވެ. އެއީ ރޯދަ މަހުގެ ހަތް ވަނަ ދުވަހެވެ. އިންތިހާބު ރޯދަ މަސް ތެރޭގައި ބެއްވުމުން, ވޯޓުލާން ނިކުންނަ މީހުންގެ އަދަދު ދަށްވާނެތީ, ޕާޓިތަކުން ދަނީ އެކަމާ ދެކޮޅަށް އަޑުއުފުލަމުންނެވެ.
ރޯދަ މަހުގެ ފަހުން މަޖިލިސް އިންތިހާބު ބޭއްވުމަށް ގާނޫނަށް އިސްލާހު ގެނެސްފިނަމަ އެކަން ކުރުމަށް ތައްޔާރަށް ތިބިކަމަށް މީގެކުރިން އީސީން ވަނީ ބުނެފަ އެވެ.
