މަލިކު އޮންނަނީ ރާއްޖެއާ އެންމެ 125 ކިލޯމީޓަރު ދުރުގަ އެވެ. ރާއްޖޭގެ އެންމެ އުތުރުގައި އޮންނަ ހއ. ތުރާކުނާއި މަލިކުގެ ދުރުމިނަކީ 80 މޭލެވެ. ރާއްޖެ އާއި އިންޑިއާގެ އިގްތިސާދީ ސަރަހައްދު ވަކިކުރާ މެރިޓައިމް ބޯޑަރާއި މަލިކާ ދެމެދުގައި އޮންނަނީ 40 ވަރަކަށް މޭލުގެ ދުރުމިނެވެ. 

މަލިކުގައި އިންޑިއާގެ އަސްކަރީ މަރުކަޒެއް ގާއިމުކޮށްފައި މި ވަނީ، އިންޑިއާ އިން ރާއްޖެއަށް ހަދިޔާކޮށްފައިވާ ވައިގެ އުޅަނދުތައް އޮޕަރޭޓް ކުރަން ތިބި އިންޑިއާ ސިފައިންގެ ބަދަލުގައި އެ ގައުމުގެ މަދަނީ މީހުން ގެންނަން ފަށާފައި ވަނިކޮށެވެ.

ރާއްޖެއާ އެންމެ 125 ކިލޯމީޓަރު ދުރުގައި އޮންނަ މަލިކުގައި ގާއިމުކުރި އިންޑިއާގެ ކަނޑުގެ ސިފައިންގެ މަރުކަޒު. 

މަލިކުގައި އިންޑިއާގެ ކަނޑުގެ ސިފައިން ގާއިމުވެ ތިބޭތާ އެތައް އަހަރެއް ވެއްޖެ އެވެ. އެކަމަކު މިއީ އިންޑިއާ ކަނޑުގައި އިންޑިއާގެ އަސްކަރީ ބާރު އިތުރުކުރަން، ނޭވަލް ބޭސްއެއް އިންޑިއާއާ އެހާ ދުރުގައި ގާއިމުކުރި ފުރަތަމަ ފަހަރެވެ.

އިންޑިއާގެ ނޫސްތަކުން ރިޕޯޓުކުރާ ގޮތުގައި މިއީ އިންޑޯ-ޕެސިފިކް ސަރަހައްދަށް ބާރު ފޯރުވުމަށާއި މެރިޓައިމް ސެކިއުރިޓީ ގާއިމުކުރަން އިންޑިއާގެ ޖަޒީރާ ރަށްތައް ބޭނުންކުރަން މޯދީގެ ސަރުކާރުން ގެންގުޅޭ ސިޔާސަތަށް ބަރާބަރަށް ފެތޭ ނިންމުންތަކެކެވެ.

އިންޑިއާ ކަނޑުގެ ސިފައިންގެ އޮޕަރޭޝަންތައް ރާއްޖޭގެ ސަރަހައްދީ ރޮނގާ މިހާ ކައިރި ކުރަން ނިންމީ ސީދާ ސަބަބު އިންޑިއާ ނޭވީން ހާމަކޮށްފައެއް ނުވެއެވެ.