މީގެ ތިން ހަފްތާ ކުރިން ފެށިގެން ރޯދަ މަހަށް ގެތައް ސާފުކޮށް ނެރެފައިހުރި ކުނިތަކުން މާލޭގެ މަގުތައް ވަރަށް ބޮޑަށް ވަނީ ގޮނޑުވެފައިވާ ކަމަށާއި މާލޭގެ ބޮޑެތި މަގުތަކާއި ގޯޅިތަކުގެ ކަންކަން މަތި ފުރިފައި ވަނީ ގޭގެއިން ނެރެފައިވާ ބާ ފަރުނީޗަރާއި ހިފާ ގެންގުޅޭ ސާމާނުތަކުން ކަމަށް އާޒިމް ވިދާޅުވި އެވެ.
އެންމެ ގިނައިން ކުނި އަޅާފައިވާ މާވެޔޮ މަގުގެ ފަތަހަ މޯލް ކުރިމަތީ ކަމަށާއި މާލެ ތެރެއިން ކޮންމެ ދުވަހަކު 10 ވަރަކަށް ޓަނުގެ ކުނި ނަގަމުން އެބަ ދާ ކަަމަށް މިއަދު މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާޒިމް ވިދާޅުވި އެވެ.
މިދިޔަ ދެ ހަފްތާ ތެތޭ ސިޓީ ކައުންސިލުން މާލެ ތެރޭގެ ކުނި ނެގުމުގެ މަސައްކަތް ކޮށްފައިވާ ކަމަށް އާޒިމް ފާހަގަ ކުރެއްވި އެވެ.
އާޒިމް ވިދާޅުވީ ކުނީގެ މައްސަލަ ހައްލު ކުރުމަށް ކުރަން ޖެހޭ ކަމަކީ ސިޓީ ކައުންސިލް އާއި ވެމްކޯ އަދި ޕޮލިހުންގެ ވެސް ކެޕޭސިޓީ އިތުރުކުރުން ކަމަށާއި އެކަމަށް ވަގުތު ބޭނުންވާނެ ކަމަށެވެ.
މަގުތަކައް ކުނި ގިނަވުމުގެ ސަބަބުން މާލޭގައި ދިރިއުޅޭ ފަރާތްތަކުން ދަނީ އެކަމާ ކަންބޮޑުވުން ފާޅު ކުރަމުން -- ފޮޓޯ: އަޒީޒް
އާޒިމް ވިދާޅުވީ މާލޭގެ ކުނީގެ މައްސަލައަށް އެއްވެސް އިދާރާއަކުން ތައްޔާރުވެފައި ނުވާ ކަމަށާއި ކުރިއަށް އޮތް ތަނުގައި މިފަހަދަ ކަމެއް ތަކުރާރު ނުވާނެ ގޮތަކަށް ތައްޔާރުވާން ޖެހޭ ކަމަށެވެ.
އާޒިމް ވިދާޅުވީ ކުނި އުކާލުމަށްދާ ޕިކަޕްތަކުން އާންމު މީހުންގެ ނާޖާއިޒް ފައިސާ ނަގަމުންދާ ކަމަށެވެ. އެގޮތުން އެކި މީހުން އެކި އަގު ނެގުމާއި އަގު ބޮޑުކޮަށް ކުނި އުކާދޭކަން އޭނާ ފާހަގަ ކުރެއްވި އެވެ.
ރައްޔިތުންނަށް ފަސޭހަ ވާނެ ގޮތަށް ކުނި އުކުމުގެ އިންތިޒާމު މާލެ ސިޓީ ކައުންސިލުން ހަޖައްސައިދޭނެ ކަމުގެ ޔަގީންކަން އާޒިމް ދެއްވި އެވެ.
- އިތުރަށް ވިދާޅުވުމަށް: މާލޭގެ ކުނީގެ މައްސަލަ އަށް ހައްލެއް ހޯދަން ޑިމޮކްރެޓްސް އިން ގޮވާލައިފި
