ޒުވާން ހަތީބުން ތަމްރީނުކުރުމަށް ބޭއްވި ޕްރޮގްރާމްގައި ބައިވެރިވި ޒުވާނުންގެ ތެރެއިން 57 ދަރިވަރަކު ވަނީ ތަމްރީނުތައް ފުރިހަމަކޮށް ސެޓްފިކެޓް ހާސިލުކޮށްފައެވެ. މި ކުދިންނަށް ހުކުރ ކުރުމުގެ ރަްމީ ހުއްދަ ދޫކޮށްފައިވަނީ މިިދިޔަ އާދިއްތަ ދުވަހުއެވެ.
އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ ހުއްދަ ލިބުނު ޒުވާނުން އަންނަ ހުކުރުގައި އިމާމްވެ ހުކުރު ކުރާނެކަމަށެވެ.
ޒުވާން ހަތީބުން ތަމްރީނުކުރުމުގެ މަޝްރޫއުގެ ދަށުން ތަމްރީނު ޕްރޮގުރާމް ނިންމާ ދަރިވަރުންނަށް ހުކުރު ކުރުމާއި ޢީދު ނަމާދުކުރުމުގެ ހުއްދަ ވަނީ ދޫކޮށްފައެވެ.
ޒުވާން ހަތީބުން ތަމްރީނުކުރުމުގެ ޕްރޮގުރާމުގައި ބައިވެރިވުމަށް ހުޅުވާލި ފުރުސަތުގައި 160 ކުދިންނާއި ވަނީ އިންޓަރވިއުކޮށްފައިވާ އިރު އިންޓަވިއުއިން ފާސްވި ކުދިންގެ ތެރެއިން 77 ކުދިންނާއެކު ޕްރޮގުރާމުގެ އަމަލީ ތަމްރީނުތައް މާލޭގައި ފެށީ މިދިޔަ ފެބްރުއަރީމަހުގެ 12 ވަނަ ދުވަހުއެވެ.
ޒުވާން ހަތީބުން ޕްރޮގްރާމަކީ ގްރޭޑް 10، 11 އަދި 12 ގައި އުޅޭ ދަރިވަރުންނަށާއި ސްކޫލް ނިމިފައިވާ ދަރިވަރުންނަށް ހުކުރުކުރުމުގެ ހުއްދަ ދިނުމަށްޓަކައި އިންތިޒާމުކުރެވިފައިވާ ޕްރޮގްރާމެކެވެ.