ވަޒީރު އިހްސާން ވިދާޅުވީ މިތަކެތި އަތުލައިގަތީ ފުލުހުންނާއި ކަސްޓަމްސްގެ އިންޓެލިޖެންސަށް ލިބުނު މައުލޫމާތުގެ އަލީގައި ހިންގި އޮޕަރޭޝަންތަކެއްގައިކަމަށެވެ. އަތުލައިގެން މަސްތުވާތަކެތީގައި ބަރުދަނުގައި 16.69 ކިލޯ ހުރިކަމަށާއި މިތަކެތީގެ މަގުމަތީ އަގު 21.6 މިލިއަން ރުފިޔާއަށް އަރާކަމަށްވެސް ވަޒީރު ވިދާޅުވިއެވެ.
މާލޭ މަޖިދީމަގުގައި ގިނަ އަދަދެއްގެ ޑްރަގްސް ވިއްކަމުން ދިޔަ ބަޔަކު މިދިޔަ އަންގާރަ ދުވަހުގެރޭ ފުލުހުން ވަނީ ހައްޔަރުކޮށްފައެވެ. މި މައްސަލާގައި ހައްޔަރުކުރި ދެމީހުން އަތުލައިގެންފައިވަނީ އެތަކެތި ހިފައިގެން ދަނިކޮށެވެ.
މީގެއިތުރުން ރާއްޖެއަށް ވައްދަން މަސައްކަތް ކުރި ޕާޓީ ޑްރަގްސް ތަކެއް މިދިޔަ ހޯމަދުވަހު ކަސްޓަމްސްއިންވެސް ވަނީ އަތުލައިގެންފައެވެ. ދެ ޕާރުސަލެއްގައި ރައްކާކޮށްގެން އެތެރެކުރި މި ތަކެތީގެ ބަރުދަނުގައި 3.3 ކިލޯ ހުރިކަމަށް ކަސްޓަމްސްއިން ވަނީ ބުނެފައެވެ.