މާލޭގައި ރޭ ބޭއްވި ކެމްޕޭނު އިވެންޓެއްގައި ވާހަކަފުޅުދައްކަވަމުން ފައްޔާޒު ވިދާޅުވީ އައްޑޫ ސިޓީއަށް މިހާރު ލިބިފައިވާ ތަރައްގީއާ ކުރިއެރުން އަނެއްކާވެސް ހަލާކުވާން ނޭދޭކަމަށްވާނަމަ އައްޑޫގެ ރައްޔިތުންގެ ފަރާތުން ވަކާލާތުކުރާނެ އެމްޑީޕީގެ މެމްބަރުންނަށް ވޯޓު ދެއްވުމަށް އެދިވަޑައިގަންނަވާކަމަށެވެ.
ފައްޔާޒު އިތުރަށް ވިދާޅުވީ، 2008 ވަނަ އަހަރު އަދި 2018 ވަނަ އަހަރު އުފެދުނު އެމްޑީޕީ ސަރުކާރުތަކުން އައްޑޫ ސިޓީގެ ތަރައްގީއަށް ގިނަ މަޝްރޫޢުތަކެއް ހިންގާފައިވާކަމަށެވެ. އޭގެ ކުރިންވެސް އަދި ދެމެދުގައިވެސް އައި ސަރުކާރުތަކުން އައްޑޫ ސިޓީއާމެދު ތަރައްގީގެ ތަސައްވުރެއް ނުގެންގުޅޭކަމަށް ފައްޔާޒު ވިދާޅުވި އެވެ.
މި ޖަލްސާގައި ރައީސް ސޯލިހު ވެސް ވަނީ ބައިވެރިވެވަޑައިގެން އައްޑޫގެ ތަރައްގީގެ ވާހަކައަށް އަލިއަޅުއްވާ ލައްވާ ވާހަކަ ދައްކަވާފައި އެވެ.
އެމްޑީޕީ ސަރުކާރުން އައްޑޫގެ ތަރައްގީއަށް ކޮށްފައި ހުރި ކަންކަން ފާހަގަކުރައްވަމުން ރައީސް ސޯލިހު ވިދާޅުވީ އައްޑޫގެ މަގު ހެދުމަށް 77 މިލިއަން ޑޮލަރު، އެއާޕޯޓު ތަރައްގީ ކުރުމަށް 26 މިލިއަން ޑޮލަރު އެގްޒިމް ބޭންކުގެ ފައިނޭންސިން އިން އޮތީ ހަމަޖެހިފައި ކަމަށާއި ރިސޯޓު ތަރައްގީ ކުރުމަށް 85 މިލިއަން ޑޮލަރު ހަރަދު ކުރެވުނު އިރު މިފްކޯގެ ކޯލްޑު ސްޓޯރޭޖު ތަރައްގީ ކުރުމަށްޓަކައި 68 މިލިއަން ރުފިޔާ ބަޖެޓު ކުރެވުނު ކަމަށް ވިދާޅުވި އެވެ.
މީގެއިތުރުން ވެސް އެތައް މަޝްރޫއެއް އައްޑޫގައި ފަށާފައިވާނެ ކަމަށާއި އެހެން ނަމަވެސް މިއަދު ފެންނަނީ މިހެން ހުރި ހުރިހާ ޕްރޮޖެކްޓުތަކެއް ހުއްޓުމަކަށް ގެނެސްފައި ހުރިތަން ކަމަށް ސޯލިހު ވިދާޅުވި އެވެ.