ދާހިލީ ވަޒީރު އަލީ އިހްސާން އެކްސްގައި ކުރެއްވި ޕޯސްޓެއްގައި ވަނީ ރޭ ގިޔާސުއްދީން ކައީރީ ފުލުހުން މަސައްކަތް ކުރި ގޮތާއި ބާރުގެ ބޭނުންކުރި ގޮތް ބަލަން ފުލުހުންގެ ކޮމިޝަނަރ އަލީ ސުޖާއުއަށް އަންގާފައި ވާނެކަމަށެވެ. އަދި ހާއްސަކޮށް ރޭ އެސްއޯ ފުލުހުން ބޭނުންކުރަން ޖެހުނު ސަބަބު ރިވިއުކޮށް ބެލުމަށްވެސް ވަޒީރު ވަނީ އަންގާފައެވެ.
ޕީއެންއެފް އުފެއްދުމުގެ ރޭ ގިޔާސުއްދީންގައި ބާއްވަން އުޅުނު ޖަލްސާއަށް ފުލުހުން ވަނީ ހުރަސް އަޅާފައެވެ. ޖަލްސާ ފަށަން ތައްޔާރުވެފައިވަނިކޮށް ޖަލްސާއަށް ދިޔަ މީހުންނަށް ފުލުހުން ހުރަސްއަޅާ އެ ސްކޫލްގެ ގޭޓް ބަންދުކޮށް މީހުން ވަނަ ނުދީ ވަނީ ހިފަހައްޓާފައެވެ. އޭރު އެއްބަޔަކުވަނީ ޖަލްސާ އޮތް ގިޔާސުއްދީންގެ ހޯލަށް ވަދެފައެވެ.
ޖަލްސާގެ ބައިވެރިން ގިޔާސުއްދީންނަށް ވަނުމަށް ހުރަސް އެޅުމުން ޕީއެންއެފްގެ ސަޕޯޓަރުން ވަނީ އެ ސަރަހައްދުގައި މުޒާހަރާކޮށްފައެވެ. އަދި މުޒާހަރާ ކޮންޓްރޯލް ކުރުމަށް ފުލުހުން ޕެޕާ ސްޕްރޭ ވަނީ ބޭނުންކޮށްފައެވެ.