މިދިޔަ ބުރާސްފަތި ދުވަހު ދެކުނުގެ އަތޮޅަށް ފެއްޓެވި ދަތުރުފުޅުގެ އެމަނިކުފާނުގެ ފުރަތަމަ މަންޒިލަކީ ލ. އަތޮޅުގެ ބައެއް ރަށްތަކެވެ. އެގޮތުން އަތޮޅުގެ އެކި ރަށްރަށުގެ ރައްޔިތުންނާއި ހުރިހާ ކައުންސިލްތަކާއި އ.ތ.މ. ކޮމިޓީތަކާ ބައްދަލުކުރައްވައި، ހައްދުންމަތީގެ ރަށްރަށުގެ ތަރައްގީއަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން މަޝްވަރާ ކުރެއްވި އެވެ.
ހައްދުންމަތީ ކައްދޫ ޑޮމެސްޓިކް އެއަރޕޯޓް ބައިނަލްއަގުވާމީ އެއަރޕޯޓެއްގެ ގޮތުގައި ތަރައްގީކުރުމަށްޓަކައި ކުރެވޭ މަސައްކަތުގެ ފަހުމުނާމާގައި ސޮއިކުރުމާއި ލާމު އިންޓެގްރޭޓެޑް މެރިޓައިމް ހަބް އިފުތިތާހު ކުރުމާއި ލާމު އިންޓެގްރޭޓެޑް މެރިޓައިމް ހަބުގެ ކޮންޓްރެކްޓް އެވޯޑްކޮށްފައިވަނީ ރައީސުލްޖުމްހޫރިއްޔާ ހައްދުންމައްޗަށް ކުރެއްވި މި ދަތުރުފުޅުގެ ތެރެއިންނެވެ.
- އިތުރަށް ކިޔާލަން: ހައްދުންމަތީ ގަމުގައި އިންޓަނޭޝަނަލް މެންޓަލް ހޮސްޕިޓަލެއް ގާއިމު ކުރަނީ
ހައްދުންމައްޗަށް އެމަނިކުފާނު މި ކުރެއްވި ރަސްމީ ދަތުފުޅު ނިންމަވާލެއްވުމަށްފަހު، ނުރަސްމީ ދަތުރުފުޅެއްގައި އިއްޔެ ހަވީރު ވަޑައިގެންނެވީ އައްޑޫސިޓީ އަށެވެ.
- އިތުރަށް ކިޔާލަން: އަމާޒަކީ މާލެ ފެންވަރަށް އައްޑޫ ތަރައްގީކުރުން: ރައީސް
އައްޑުއަށް ވަޑައިގެން ރައީސް މުއިއްޒު ވަނީ އައްޑު ރައްޔިތުންނާ ބައްދަލުކުރައްވާފަ އެވެ. އަދި ރައްޔިތުންގެ މަޖިލީހުގެ އިންތިހާބުގައި ޕީއެންސީގެ ޓިކެޓުގައި ވާދަކުރައްވާ ކެންޑިޑޭޓުންގެ ކެމްޕޭން ހަރަކާތެއްގައި ބައިވެރިވެވަޑައިގެންފައިވެ އެވެ. މި ސަރުކާރުގައި އައްޑޫ ސިޓީއަށް ގިނަ ތަރައްގީގެ މަޝްރޫއުތައް ގެންނާނެ ކަމަށް ރައީސް ވަނީ ވައުދުވެވަޑައިގެންފަ އެވެ. މި ވައުދުތައް ފުއްދުމަށް ރައްޔިތުންގެ މަޖިލީހުން އެއްބާރުލުން ލިބޭނީ މަޖިލިސް މެޖޯރިޓީ ސަރުކާރަށް ލިބިގެންކަމަށް ރައީސް ވަނީ ވިދާޅުވެފަ އެވެ.
އައްޑޫސިޓީގައި ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ޑރ. މުހައްމަދު މުޢިއްޒު ވިދާޅުވީ، މާލެއާއި އެއް ފެންވަރުގެ ހިދުމަތް ނުވަތަ އެއަށްވުރެ މަތީ ފެންވަރަށް އައްޑޫ ސިޓީ ތަރައްގީކުރައްވާނެކަމަށެވެ.
އެހެންކަމުން އެމަނިކުފާނުގެ ދައުރުގެ އެންމެ ފުރަތަމަ ދުވަހުވެސް އެ މަސައްކަތް ފަށްޓަވާފައިވާކަން ތަކުރާރުކުރައްވާ ރައީސް ވިދާޅުވީ ކޮންމެ ދުވަހަކީވެސް ރައްޔިތުންގެ ކުރިއެރުމާ ތަރައްގީއަށް މަސައްކަތް ކުރާ ދުވަހަކަށް ހަދަން ބޭނުންވާކަމަށެވެ. ރައީސް ވަނީ ދެކުނު ޒޯންގެ މައި ހަބަކީ އައްޑޫ ސިޓީކަމުގައި ހަދާނެކަމުގެ ޔަގީންކަން ދެއްވާކަމަށް ވިދާޅުވެފަ އެވެ.
