ޕީއެންސީއަށް އަލުން ސޮއިކުރި ހަ މެންބަރުން ރައީސް ޑރ. މުހައްމަދު މުއިއްޒާ އެކު ނަންގަވާފައިވާ ފޮޓޯއެއް އެ ޕާޓީގެ ރަސްމީ "އެކްސް" އެކައުންޓުން މިއަދު ޕޯސްޓުކޮށް، ޕާޓީއަށް ސޮއިކޮށްފައިވާކަން ވަނީ ހާމަކޮށްފަ އެވެ.
އެކަމާ ގުޅޭގޮތުން ހަބީބު "އެކްސް" ގައި ކުރެއްވި ޕޯސްޓެއްގައި ވިދާޅުވީ ގާނޫނުއަސާސީގެ 73 ވަނަ މާއްދާގައި ބުނާ ޝަރުތުތަކުންކުރެ ޝަރުތެއް މި ހަ ބޭފުޅުންގެ އުނި ނުވާ ކަމަށެވެ. އަދި އެންޓި-ޑިފެކްޝަން ގާނޫނުގެ ތިންވަނަ މާއްދާގައި ބުނާ ގޮތުން 20 ވަނަ ރައްޔިތުންގެ މަޖިލީހުގެ ދައުރު އަދި ނުފެށޭތީ އިންތިހާބުވެވަޑައިގެންފައިވާ ކޮންމެ މެންބަރަކަށް ވެސް އަންނަ މެއި މަހުގެ 28 ގެ ކުރިން އެ ބޭފުޅަކު ބޭނުންވާ ޕާޓީއަކާ ގުޅިވަޑައިގަތުމުގެ ފުރުސަތު އޮތް ކަމަށް އޭނާ ވިދާޅުވި އެވެ.
ކޮންގްރެސް ޕާޓީއަށް އަލަށް ސޮއިކުރެއްވި މެންބަރުން:
- ޑރ. އަނާރާ ނައީމް - ހުރާ ދާއިރާ
- ހަސަން ޒަރީރު - މަތިވެރި ދާއިރާ
- އަހުމަދު ޒަމީރު - މައްޗަންގޮޅި މެދު ދާއިރާ
- އަހުމަދު ރިޔާޒް - ތިމަރަފުށި ދާއިރާ
- ޔާސީން އަބްދުﷲ - ނައިފަރު ދާއިރާ
- އާޒިމް އަބްދުލް އަޒީޒް - ވިލިގިނލި ދާއިރާ
މީގެ ތެރެއިން ފަސް ބޭފުޅުންނަކީ މަޖިލިސް އިންތިހާބުގައި އަމިއްލަގޮތުން ވާދަކުރި ނަމަވެސް ޕީއެންސީގެ ދަފުތަރުގައި ތިއްބެވި ބޭފުޅުންނެވެ. އަނާރާ އާއި އާޒިމް އަދި ޒަމީރަކީ ޕްރޮގްރެސިވް ކޮންގްރެސް ކޯލިޝަނުގެ ޕްރައިމަރީގައި ވާދަކޮށް ބަލިވި ތިން ބޭފުޅުންނެވެ. އެ ބޭފުޅުންގެ ތެރެއިން އަނާރާ އާއި ޒަމީރު އިންތިހާބަށް ނިކުންނަވާފައި ވަނީ ރައީސް މުއިއްޒުގެ ތާއީދާ އެކުގަ އެވެ.
