ދައުލަތުގެ ދަރަނި މި އަހަރުގެ ފުރަތަމަ ކުއާޓަރު ނިމުނުއިރު 126 ބިލިއަން ރުފިޔާއަށް ވަނީ އިތުރުވެފަ އެވެ. ފުރަތަމަ ކުއާޓަރުގައި ޖުމްލަ ދަރަނި އިތުރުވެފައި ވަނީ އެތެރޭގެ ދަރަނިތަކުގެ ސަބަބުންނެވެ. އެތެރޭގެ ދަރަނި މިހާރު ހުރީ 74.5 ބިލިއަން ރުފިޔާގަ އެވެ.
ލޯނުތަކަށް އެއް ބިލިއަން ރުފިޔާ ދައްކާފައިވާއިރު، އަހަރުގެ މިހާތަނަށް ދަރަނީގެ އިންޓަރެސްޓާ އެކު 1.6 ބިލިއަން ރުފިޔާ ވަނީ ދައްކާފަ އެވެ. ލޯނުތަކާ އެކު ދަރަނީގެ އިންޓަރެސްޓަށް 5.2 ބިލިއަން ރުފިޔާ ދައްކަން ޖެހެ އެވެ.
މި އަހަރު ލޯނު ދައްކަން 2.2 ބިލިއަން ރުފިޔާ ހޭދަކުރަން ޖެހޭ ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކަ އެވެ. ލޯނުތަކަށް މިހާތަނަށް އެއް ބިލިއަން ރުފިޔާ ދެއްކިއިރު، މިއީ ދަރަނީގެ ގޮތުގައި އަދާކުރަން ޖެހޭ އަދަދުގެ 45 އިންސައްތަ އެވެ.
ދަރަނި އަދާ ކުރުމަށް 2026 ވަނަ އަހަރު 15 ބިލިއަން ރުފިޔާ ހަރަދުކުރަން ޖެހޭއިރު، އެއީ ދައުލަތުން އެންމެ ބޮޑު ދަރަންޏެއް އަދާ ކުރަން ޖެހޭ އަހަރެވެ.
- އިތުރަށް ކިޔާލަން: ރާއްޖޭގެ މާލީ ހާލަތުގެ ހަގީގަތް ރައްޔިތުންނަށް ބުނެދޭން ޖެހޭ: ނާޒިމް
