ފެތުމުގެ ކުޅިވަރުން އޮލިމްޕިކް ގޭމްސްގައި ދިވެހިރާއްޖެއަށް ލިބިފައިވާ މި 2 ފުރުސަތަކީ ޔުނިވަރސިލިޓީ ޕްލޭސަސްގެ ދެފުރުސަތެވެ. އެއީ ކޮލިފައިނުވާ ގައުމުތަކަށް ދޭ ފުރުސަތުތަކުގެ ތެރެއިން ފުރުސަތެވެ.
އޮލިމްޕިކް ގޭމްސްއަށް ދާނެ ދިވެހި ދެ ފެތުންތެރިން ކަނޑައެޅުނީ ވޯލްޑް އެކުއަޓިކްސްއިން ކަނޑައަޅާފައިވާ ފެތުމުގެ ވަކި މުބާރާތްތަކެއްގައި ވާދަކުރި ދިވެހި ފެތުންތެރިންގެ ތެރެއިން އެންމެ މަތިން ވޯލްޑް އެކުއަޓިކްސް ސްވިމިންގ ޕޮއިންޓް ލިބިގެންނެވެ.
އޮލިމްޕިކްސް ވާދަކުރާނެ ފެތުންތެރިން ކަނޑައަޅުމުގައި އަމަލުކުރާނެ އުސޫލުތަކާއި މިންގަނޑުތައް ކަނޑައަޅަނީ ވޯލްޑް އެކުއަޓިކްސް އިންނެވެ.
ސްވިމިން އިން އޮލިމްޕިކްސްއަށް ދާ އެތްލީޓުން ކަނޑައެޅުމާއެކު ރާއްޖޭގެ އޮލިމްޕިކް ކޮންޓިންޖެންޓުގެ ހުރިހާ މެންބަރުން ކަނޑައަޅައި ނިމުނީއެވެ. މި ފަހަރުގެ އޮލިމްޕިކްސްގައި ރާއްޖޭން ހަތަރު ކުޅިވަރަކުން ވާދަކުރާނެ އެވެ. އެއީ، އެތުލެޓިކްސްގެ އިތުރުން ބެޑްމިންޓަން، ޓޭބަލް ޓެނިސް އަދި ފެތުމެވެ.
ޓީޓީން ރާއްޖެ ތަމްސީލް ކުރާނީ ފާތިމަތު ދީމާ އަލީއެވެ. ދީމާ އަކީ، ރާއްޖޭން އޮލިމްޕިކްސް އަށް ކޮލިފައިވި ފުރަތަމަ އެތުލީޓެވެ. އެތްލެޓިކްސްއިން ރާއްޖެ ތަމްސީލް ކުރާނީ އިބާދުﷲ އާދަމްއެވެ. ބެޑްމިންޓަނުން ދާނީ ފާތިމަތު ނަބާހާއެވެ. އަދި އަދި ސްވިމިންއިން އާން އާއި އުލްޔާއެވެ.
އޮލިމްޕިކްސް އަށް ރާއްޖޭން ޗެފް ޑި މިޝަނަރަކަށް ހަމަޖެއްސީ ޓޭބަލް ޓެނިސް އެސޯސިއޭޝަންގެ ރައީސް އަލީ ރަޝީދު (އައްޔަ) އެވެ.
