ހަނިމާދޫ އިންޓަނޭޝަނަލް އެއާޕޯޓް ޕްރޮޖެކްޓްގެ މަސައްކަތް ކުރިއަށްދާ ގޮތް ބައްލަވާލައްވައި މަސައްކަތުގައި ހަރަކާތްތެރވަމުންދާ ފަރާތްތަކާ ބައްދަލުކުރެއްވުމަށް މިނިސްޓަރު އަމީން ހަނިމާދޫ އަށް ވަޑައިގަތީ އިއްޔެގެ ވަގުތެއްގަ އެވެ.
އެގޮތުން ހަނިމާދޫއަށް ޒިޔާރާތް ކުރެއްވި ކަމަށާއި އެއާޕޯޓުގެ މަސައްކަތް ކުރިއަށް ދާނީ ތާވަލާ އެއްގޮތަށްކަމަށް އަމީން ކުރެއްވި ޕޯސްޓުގައި ވިދާޅުވި އެވެ.
ހަނިމާދޫ އެއާޕޯޓުގައި ހަދަމުން އަންނަ އާ ރަންވޭގެ އެއްބައި ނިންމައި ބޭނުންކުރަން ފެށީ ނިމުނު ޖެނުއަރީ މަހުގަ އެވެ. އެއާޕޯޓުގެ ރަންވޭގެ މަސައްކަތް ކުރިއަށް ދަނީ 3 ފިޔަވަށްސަކަށް ބަހާލައިގެންނެވެ.
ހަނިމާދޫ އިންޓަރނޭޝަނަލް އެއާޕޯޓު ޕްރޮޖެކްޓަކީ މުޅި އުތުރުގެ ފަތުރުވެރިކަމާ ގުޅިފައިވާ ބޮޑުތިލަދުންމަތީގެ އިގުތިސޯދާއި ސީދާ ގުޅިފައިވާ މަޝްރޫއެކެވެ. މި ޕްރޮޖެކްޓަށް އިންޑިއާގެ އެގްޒިމް ބޭންކުން ވަނީ 136 މިލިއަން ޑޮލަރު (ދެ ބިލިއަން ރުފިޔާ) ލޯނު ހަމަޖައްސައިދީފަ އެވެ.
އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭނެ ގޮތަށް ހަދަމުން އަންނަ މި އެއާޕޯޓުގެ ރަންވޭގެ އެއްކޮށް ނިމުމުން، އޭ320 އަދި ބޮއިން737 ބޯޓުތައް ވެސް ޖެއްސޭނެ އެވެ.
