ޝިމާދު މިހެން ވިދާޅުވީ ރޭ ބޭއްވި އެސްޓިއޯގެ އަހަރީ އާއްމު ޖަލްސާގައި ހިއްސާދާރު ކުރި ސުވާލަކަށް ޖަވާބުދެއްވަމުންނެވެ. ހިއްސާދާރުން އެދުނީ އެރިޓްރިއާގައި ހިފަހައްޓާފައި އޮތް އެފްއެސްއެމްގެ ދެ ބާޖުގެ ގެނައުމުގައި ހިނގާ މުއާމަލާތުގެ އެންމެ ފަހުގެ މައުލޫމާތު ސާފުކޮށްދިނުމަށެވެ.
މި ސުވާލަށް ޖަވާބު ދެއްވަމުން ޝިމާދު ވިދާޅުވީ އެ ދެ ބާޖު ރާއްޖެ ގެނަައުމުގައި އަލިމަގެއް އަދި ނުފެންނަކަމަށާއި އަދި އެކަމުގައި އަލި މަގެއް ފެންނާނެކަމުގެ ޔަގީންކަމެއްވެސް ނެތްކަމަށެވެ. ސަބަބެއްކަމަށް ވިދާޅުވީ އެރިޓްރިއާއާ މުއާމަލާތު ކުރަން ވަރަށް އުނދަގޫވުމުންކަމަށެވެ.
އެރިޓްރިއާގައި ހިފަހައްޓާފައިވާ އެފްއެސްއެމްގެ ބޯޓު 'މާރެހި' - ފޮޓޯ:އެފްއެސްއެމް
މިސްރުގެ ކުންފުންޏަކާއި ހަވާލުކޮށްގެން އެފްއެސްއެމުން ބަންދެން 4 ބާޖުގެ ތެރެއިން ދެ ބާޖު އެރިޓްރިއާގައި ހިފަހައްޓާފައިވަނީ ހުއްދަ ނުހޯދާ އެ ގައުމަށް އެތެރެވި ކަމަށް ބުނެއެވެ. މިދިޔަ އަހަރުގެ އެޕްރީލް މަހުގެ 26 ވަނަ ދުވަހު އެ ދެ ބާޖު އެރިޓްރިއާގައި ބަނދަރުކޮށްފައިވަނީ މިސްރުން ފުރައިގެން ރާއްޖެއަށް ކުރި ދަތުރުގައި މޫސުން ގޯސްވެ ބޯޓެއްގެ ހުންގާނަށް މައްސަލައެއް ދިމާވުމުގެ ސަބަބުންނެވެ.
އިތުރަށްް ކިޔާލުމަށް: އެފްއެސްއެމްގެ ދެ ބޯޓު ހިފެހެއްޓި މައްސަލަ އެރިޓްރިއާގެ ކޯޓަށް
އެފްއެސްއެމްގެ މި ދެ ބާޖު ހިފެހެއްޓިއިރު، ކޮންމެ ބޯޓެއްގައިވެސް ދެ ދިވެހިންނާއި މިސްރުގެ ހަތަރު ފަޅުވެރިން ތިއްބެވެ. އެމީހުންވެސް އެތައް ދުވަހަކު ހިފަހައްޓާފައި ބޭތިއްބުމަށްފަހު ފަހުން ވަނީ ދޫކޮށްލާފައެވެ.
މި ދެ ބާޖު ގެނައުމަށް މިދިޔަ ސަރުކާރުންވެސް ވަނީ މަސައްކަތްތަކެއް ކޮށްފައެވެ. އެގޮތުން ކުރީގެ ފޮރިން މިނިސްޓަރު އަބްދުﷲ ޝާހިދުގެ ސިޓީފުޅެއް އެ ގައުމުގެ ސަރުކާރަށްވެސް ފޮނުވިއެވެ.
