އެ އިދާރާއިން ބުނީ ޖުލައި 15 ވަނަ ދުވަހު ޑްރަގް ކޯޓުގެ އަމުރެއްގެ ދަށުން މުހައްމަދު އަޒްމީލް ޖަލީލް ހައްޔަރުކުރުމަށް ފުލުހުން އެ ގެއަށްގޮސް ތިއްބާ، އެ ގޭގެ ކުޑަދޮރަކުން ނިކުމެ ފިލަން އުޅުމުގެ ތެރޭގައި އޭނާ މަގުމައްޗަށް ވެއްޓި އަނިޔާވެ، ދަރުމަވަންތަ ހޮސްޕިޓަލުގައި ފަރުވާ ދެމުންދާކަމަށް ބުނާ ހާދިސާ އެންޓި-ޓޯޗަރ ޤާނޫން 2013 ގެ ދަށުން ތަޙުޤީޤު ކުރަމުންދާކަމަށެވެ.
މި މައްސަލައާ ގުޅިގެން މިހާތަނަށް އާއިލާގެ ފަރާތުން މައުލޫމާތު ހޯދައި، ދިވެހި ފުލުހުންގެ ހިދުމަތުގެ ފަރާތުން މަޢުލޫމާތު ހޯދުމަށް އެދިފައިވާނެކަމަށް އެޗްއާރުސީއެމުން ބުނެއެވެ.
އެޗްއާރުސީއެމުން ބުނީ މިހާތަނަށް ލިބިފައިވާ މަޢުލޫމާތައް ބަލާއިރު، މި ހާދިސާ ހިނގުމުން އާއިލާއިންވެސް އަޒްމީލް ޖަލީލް ހޮސްޕިޓަލަށް ގެންދިޔުމަށް އެދިފައިވަނިކޮށް، ހޮސްޕިޓަލަށް ނުގެންގޮސް ފުލުހުންގެ ބެލުމުގެ ދަަށަށް އެ ދުވަހުގެ މެންދުރު 02:45 ގައި މާލެ ކަސްޓަޑީއަށް ގެންދިޔަކަމަށެވެ. އަދި އެނާ ހޮސްޕިޓަލަށް ގެންދިޔުމަށް ވެހިކަލަށް އަރުވާފައިވަނީ 03:01 ގައި ކަމަށް ފާހަގަކުރެވިފައިވާކަމަށް އެޗްއާރުސީއެމުން ބުނެއެވެ. އަދި ހައްޔަރުކުރުމުގައި އަނިޔާއެއް އެއްވެސް މީހަކަށް ވެއްޖެނަމަ އެ ފަރާތެއް ހައްޔަރަށް ގެންދިޔުމުގެ ބަދަުގައި ފަރުވާއަށް ގެންދިޔުމަށް މީގެ ކުރިންވެސް ފުލުހުންނަށް އަންގާފައިވާނެކަމަށް އެޗްއާރުސީއެމްުން ބުނެއެވެ.
އިތުރަށް ކިޔާލުމަށް : ފުލުހުންގެ ބެލުމުގެ ދަށަށް ގެންދިޔަ މީހަކަށް ފަރުވާދެނީ
މި މައްސަލައިގެ ތަޙުޤީގު ވީހާވެސް އަވަހަކަށް ނިންމުމުގެ މަސައްކަތް ކޮމިޝަނުންދަނީ ކުރަމުންދާކަމަށާއި އަދި ތަހުޤީގު ނިމުމުން މައްސަލައިގައި ފާހަގަވާ ކަންކަން ގުޅުންހުރި އިދާރާތަކުގެ ސަމާލުކަމަށް ގެންނާނެކަމަށްވެސް އެޗްއާރުސީއެމުން ބުނެފައިވެއެވެ.
