ސީމީވީ 6 ސަބްމެރިން ކޭބަލް ރާއްޖޭގައި ރަސްމީކޮށް އިފްތިތާހުކޮށްފައި ވަނީ ހުޅުމާލޭ ދެވަނަ ފިޔަވަހީގައި ބޭއްވި ރަސްމިއްޔާތެއްގަ އެވެ. އަދި އެ ރަސްމިއްޔާތު ޝަރަފުވެރިކޮށްދެއްވީ ލޯކަލް ގަވަމަންޓް މިނިސްޓަރު އާދަމް ޝަރީފް އުމަރު އެވެ.
ދިރާގުން ބުނީ މިއީ ރާއްޖޭގެ މުވާސަލާތީ ތާރީހުގައި ބައިނަލްއަގުވާމީ ސަބްމެރިން ކޭބަލް ސިސްޓަމް ކޮންސޯޓިއަމްގެ ފުރިހަމަ މެންބަރެއްގެ ގޮތުގައި ރާއްޖޭގެ ޑިޖިޓަލް ހިދުމަތް ދޭ ކުންފުންޏެއް ބައިވެރިވާ ފުރަތަމަ ފަހަރު ކަމަށެވެ.
އެންމެ ފަހުގެ ކަނޑުއަޑީގެ ކޭބަލް ޓެކްނޮލޮޖީން ފަރުމާކޮށްފައިވާ މި ސިސްޓަމް ސިންގަޕޫރުން ފެށިގެން ފަރަންސޭސިވިލާތާ ދެމެދު އެގާރަ ގައުމެއްގައި ޖައްސާނެ އެވެ. ދިގުމިނުގައި 19،200 ކިލޯމީޓަރު ހުންނަ މި ސަބްމެރިން ކޭބަލް ސިސްޓަމްގެ ޓްރާންސްމިޝަން ސްޕީޑް ފަށާނީވެސް 100 ޓީބީޕީއެސް އިންނެވެ.
މި ގްލޯބަލް ސިސްޓަމްގެ ފުރިހަމަ ބައިވެރިއަކަށްވުމަށްޓަކައި ދިރާގުން ވަނީ 2021 ވަނަ އަހަރު ބައިނަލްއަގްވާމީ 16 ޓެލްކޯ އަދި ޓެކް ކުންފުންޏެއް ޝާމިލްވާ ކޮންސޯޓިއަމެއްގައި ބައިވެރިވެފަ އެވެ. އެގޮތުން ދިރާގުން މި ކުރި ބޮޑު އިންވެސްޓްމަންޓުގެ ސަބަބުން ދުނިޔޭގެ މުހިއްމު އިންޓަނެޓް އެކްސްޗޭންޖް ޕޮއިންޓްތަކާއި ޑޭޓާ ސެންޓަރުތަކާއި ދިވެހިރާއްޖެ ސީދާ ގުޅުވާލެވި، ރާއްޖޭގެ ބައިނަލްއަގްވާމީ ކަނެކްޓިވިޓީ އިތުރަށް ހަރުދަނާވެގެންދާނެ އެވެ.
ދިރާގުގެ ސީއީއޯ އަދި މެނޭޖިން ޑިރެކްޓަރު އިސްމާއީލް ރަޝީދު
ސީމީވީގެ ސަބަބުން ކަސްޓަމަރުންނާއި ވިޔަފާރިތަކަށް ފޯރުކޮށްދޭ ހިދުމަތްތަކުގެ ފެންވަރު މިހާރަށްވުރެ ރަނގަޅުވެ، މުސްތަގުބަލުގައި ރާއްޖޭގެ އެކި ކަންކޮޅުތަކުގައި ޑިޖިޓަލް ހިދުމަތްތައް މިހާރަށް ވުރެ ފުރިހަމަވެގެން ދާނެ ކަމަށެވެ.
ދިރާގުގެ ސީއީއޯ އަދި އެމްޑީ އިސްމާއީލް ރަޝީދު ވިދާޅުވީ ދިރާގުގެ ޑިޖިޓަލް ނެޓްވަކް ސީ-މީ-ވީ 6 ސަބްމެރިން ކޭބަލް ސިސްޓަމާ ގުޅާލުމަކީ ދުނިޔޭގެ ފެންވަރުގެ ޑިޖިޓަލް ހަބެއްގެ ގޮތުގައި ރާއްޖެ ގާއިމްކޮށް، އެ ކުންފުނީގެ މުވާސަލާތީ ވިއުގަ އިތުރަށް ވަރުގަދަ ކުރުމަށް އެޅޭ މުހިންމު ފިޔަވަޅެއް ކަމަށެވެ.
