އެއް ދުވަހަށް ކުރިއަށް ގެންދާ ކޮންފަރެންސްގެ ބޭނުމަކީ، ރާއްޖެ އާއި ޗައިނާގެ ކުންފުނިތަކުގެ ވިޔަފާރި ގުޅުންތައް އިތުރުކޮށް، ރާއްޖޭގައި ހުރި އިންވެސްޓްމެންޓްތަކާ ގުޅޭ މައުލޫމާތުތައް ޗައިނާގެ ކުންފުނިތަކަށް ދިނުމެވެ.
މިއަދު ހެނދުނު 9:30ގައި ފެށިގެންދިޔަ މި ކޮންފަރެންސްގައި ދެގައުމުން 100އެއްހާ މީހުން ބައިވެރި އެވެ. ސެޕްޓެމްބަރު މަހުން ފެށިގެން ޗައިނާއާއި ރާއްޖެއާ ދެމެދު ވެފައިވާ މިނިވަން ވިޔަފާރީގެ އެއްބަސްވުމަށް އަމަލުކުރަން ފެށިގެން ދާއިރު މިކޮންފަރެންސްގެ މަގްސަދަކަށް ވަނީ ދެގައުމުގެ ވިޔަފާރިތައް ދެފަރާތުން ދެނެގަނެ، އަހުލިވެރި ވުމެވެ.
ކޮންފަރެންސްގައި އިކޮނޮމިކް މިނިސްޓަރު މުހައްމަދު ސައީދު، ޗައިނާއިން ރާއްޖެއަށް ހަމަޖައްސާފަ ހުންނަވާ ސަފީރު، ވޭންގް ލީޒިން، އެކި ވުޒާރާ ތަކުގެ މަތީ ބޭފުޅުން، އަދި ދެ ގައުމުގެވެސް ވިޔަފާރިވެރިން ބައިވެރިވި އެވެ.
ސައީދު ވާހަކަ ދައްކަވަމުން ވިދާޅުވީ ރާއްޖެއިން ހަދާފައި މިވާ މިނިވަން ވިޔަފާރީގެ އެއްބަސްވުމުން ވީހާވެސް ބޮޑު ފައިދާތަކެއް ރާއްޖެއަށް ލިބޭ ގޮތަށް ކަންތައް ކުރާނެ ކަމުގެ ޔަގީންކަން ދެއްވާކަމަށެވެ.
މި ރަސްމިއްޔާތުގައި ޗައިނާއިން ރާއްޖެއަށް ހަމަޖައްސާފަ ހުންނަވާ ސަފީރު، ވޭންގް ލީޒިން ވަނީ ޗައިނާގެ ބެލްޓް އެންޑް ރޯޑް މަޝްރޫއުގެ ދަށުން ކުރިއައްދާ އެކި މަސައްކަތުގެ ވާހަކަ ދައްކަވާފަ އެވެ. ވާހަކަ ނިންމަވާލަމުން ވޭންގްވަނީ ޗައިނާގެ ސިޗުއާންއަށް ޒިޔާރަތް ކޮއްލާ ޗައިނާއިން ޒަމާނީފެންވަރަށް ތަރައްގީ ކޮށްފައިވާ ތަންތަން ބަލާލަން ދިވެހިންނަށް ދައުވަތު އަރުވާފަ އެވެ.
މިކޮންފަރެންސްގައި ބައިވެރިވެފައި ވަނީ ދަނޑުވެރިން، މޭވާއާއި ތަރުކާރީ ސަޕްލައިކުރާ ފަރާތްތައް، ކާބޯތަކެތި އުފެއްދުމާއި، ޕްރޮސެސްކުރުމާއި، އެކްސްޕޯޓްކުރުމާއި، ސަޕްލައިކުރާ ފަރާތްތައް، ކޮންސިއުމާ ގޫޑްސް އަދި ހޯލްސޭލް ކުރާ ފަރާތްތައް، އަދި ޓޫރިޒަމް ދާއިރާގެ ފަރާތްތަކުންނެވެ.
