އާސަންދައިގެ ދަށުން ރާއްޖެއިން ބޭރުގެ ބައެއް ހޮސްޕިޓަލުތަކުން ފަރުވާ ހޯދެ އެވެ. އެގޮތަށް އެންމެ ގިނަ މީހުން ފަރުވާ އަށް ދަނީ އިންޑިއާ އަދި ސްރީ ލަންކާ އަށެވެ.
އާސަންދަ މެދުވެރިކޮށް ބަލިމީހުން ފޮނުވުން ވަގުތީ ގޮތުން މެދުކަނޑާލީ:
1. ބެންގަލޫރުގެ އެސްޓާ ސީއެމް
2. ސައިޓް ކެއާ ހޮސްޕިޓަލް ޕްރައިވެޓް ލިމިޓެޑް
އާސަންދައިން ބުނީ މި ދެތަނަށް ބަލިމީހުން ފޮނުވުން ހުއްޓާލީ އެ ދެ ތަނުން އެދިގެން ވަގުތީ ގޮތުން ކަމަށެވެ.
އާސަންދައިން މިފަހުން ވަނީ ބެންގަލޫރުގެ މަނިޕާލް ހޮސްޕިޓަލުން އާސަންދައިގެ ހިދުމަތް މެދުކަނޑާލައިފަ އެވެ. އެ ހޮސްޕިޓަލުން އާސަންދަ ހިދުމަތް މެދުކަނޑާލީ ހިދުމަތް ހޯދަާ މީހުންގެ އަތުން އިތުރަށް ފައިސާ ނަގަމުންދާ ކަމުގެ ޝަކުވާއާ ގުޅިގެންނެވެ.
ބެންގަލޫރުގެ ހޮސްޕިޓަލުތަކުގެ ތެރެއިން އާސަންދައިގެ ހިދުމަތް މިހާރު ލިބޭ ހޮސްޕިޓަލުތައް:
- ދަ އައި ފައުންޑޭޝަން ސުޕަ ސްޕެޝާލިޓީ އައި ހޮސްޕިޓަލް
- ކަޑަބަމްސް ހޮސްޕިޓަލް އެންޓަ ޕްރައިޒަސް
- ސްޕާޝް ހޮސްޕިޓަލް
- ސަކްރާ ވޯލްޑް ހޮސްޕިޓަލް
- ރެއިންބޯ ޗިލްޑްރެންސް މެޑިކެއާ
- އެން ޔޫ ހޮސްޕިޓަލް - ވެސްޓް
- އެން ޔޫ ހޮސްޕިޓަލް - ސައުތު
- ނަރަޔާނާ ނެތްރަލަޔާ
- ހެލްތު ކެއާ ގްލޯބަލް އެންޓަ ޕްރައިސަސް
- ބީޖީއެސް ގްލެނީގްލްސް ގްލޯބަލް ހޮސްޕިޓަލް
- އެޕޯލޯ ހޮސްޕިޓަލް
އާސަންދައިގައި ބޭރުގެ 57 ހޮސްޕިޓަލެއް އެމްޕެނަލްއިވެ ވެފަ އެވެ. އޭގެ ތެރެއިން 49 ހޮސްޕިޓަލަކީ އިންޑިއާގެ ތަންތަނެވެ.
އާސަންދައިން އާއްމުކުރި ތަފާސް ހިސާބުތައް ދައްކާގޮތުން މިއަހަރުގެ ދެވަނަ ކުއާޓާގައި 823 މިލިއަން ރުފިޔާ ވަނީ ހަރަދުކޮށްފަ އެވެ. ފުރަތަމަ ކުޢާޓާގައި މިއަދަދު ހުރީ 838 މިލިއަންގަ އެވެ.
އާސަންދައިން ބުނީ އަހަރުގެ ދެވަނަ ކުއާޓާއި އެ ސްކީމުން 265،059 މީހުން ހިދުމަތް ހޯދާފައިވާކަމަށެވެ. އަދި ދެވަނަ ކުޢާޓާގައި އިމެޖެންސީގައި ބަލި މީހުން އުފުލި އަދަދަކީ 1232 ކަމަށެވެ.
ދެވަނަ ކުއާޓާގައި އާސަންދަ ސްކީމްގެ ދަށުން ރާއްޖެއިން ބޭރު ބޭސް ފަރުވާކުރި އަދަދު 2807 އަރާކަމަށެވެ.
ރާއްޖޭގައި އާސަންދައިގެ ހިދުމަތް ދޭ ސަރުކާރު ހޮސްޕިޓާތަކާއި ސިއްހީ މަރުކަޒުތަކުގެ އަދަދަކީ 193 އެވެ. އަމިއްލަ ހޮސްޕިޓާތަކާއި ކްލިނިކްތައް ހިމެނޭ ގޮތަށް 141 ތަނަކުން އާސަންދައިން ހިދުމަތް ދެއެވެ.
