މި ގޮތުން އެންމެ ފަހުން މި ލިބުނު އުފާވެރި ހަބަރަކީ މި މަހުގެ 13 ވަނަ ދުވަހުން ފެށިގެން މޯލްޑިވިއަން ފްލައިޓްތައް ޓްރިޕް ޑޮޓް ކޮމް މެދުވެރިކޮށް ސީދާ ބުކްކުރެވޭގޮތްވުމެވެ.
ދުނިޔޭގެ އެންމެ މަޝްހޫރު އޮންލައިން ދަތުރު ބުކިން ޕްލެޓްފޯމްތަކުގެ ތެރެއިން އެއް ޕްލެޓްފޯމް ކަމަށްވާ ޓްރިޕް ޑޮޓް ކޮމްއާއެކު މި ވެވުނު އެއްބަސްވުމަކީ، މޯލްޑިވިއަންގެ ހިދުމަތްތައް ދުނިޔޭގެ އެތައް މިލިއަން ދަތުރުވެރިންނަށް ފަސޭހައިން ލިބޭނެ މަގު ތަނަވަސްވެގެންދިއަކަމެކެވެ. މިއީ ދިވެހިރާއްޖެއަށް ދަތުރުކުރާ ފަސިންޖަރުންނަށް އިތުރު ފުރުސަތުތަކެއް ހުޅުވިގެންދާނެ ކަމެކެވެ.
މީގެ އިތުރުން، މޯލްޑިވިއަން ވަނީ ޗައިނާގެ މާކެޓަށް ވަނުމުގެ މަސައްކަތްތައްވެސް ފަށާފައެވެ. މި ގޮތުން ޗައިނާއަށް ދަތުރުތައް ފެށުމަށްޓަކައި އެ ގައުމުގައި މޯލްޑިވިއަންގެ ކާގޯ އެޖެންޓުންގެ ގޮތުގައި ހަރަކާތްތެރިވާނެ ފަރާތްތައް ހޯދުމުގެ މަސައްކަތް ވަނީ ފަށާފައެވެ.
މޯލްޑިވިއަންގެ ހިދުމަތްތައް އިތުރަށް ފުޅާކުރުމުގެ ގޮތުން، އެއާބަސް އޭ330-200ގެ ވައިޑް-ބޮޑީ މަތިންދާބޯޓެއް ގެނައުމުގެ މަސައްކަތްވެސް އަންނަނީ ކުރަމުންނެވެ. މި މަތިންދާ ބޯޓު ބޭނުންކުރަން ފެށުމުން، ބޭރުގެ އެކި މަންޒިލްތަކަށް ސީދާ ދަތުރުތައް ފެށިގެންދާނެއެވެ. މި ބޯޓު ރާއްޖެ ގެނެސް، އަންނަ އަހަރުގެ ފުރަތަމަ ކުއާޓަރުގެ ތެރޭގައި ޗައިނާއަށް ދަތުރުތައް ފެށުމަށް ވަނީ ރޭވިފައެވެ.
މި ހުރިހާ މަސައްކަތްތަކަކީވެސް ދިވެހިރާއްޖޭގެ ޤައުމީ އެއަރލައިނުގެ ހައިސިއްޔަތުން، ރާއްޖެ ދުނިޔެއާ ގުޅުވައިދިނުމަށާއި، ދިވެހިންގެ މެހެމާންދާރީ އެންމެ ފުރިހަމަ ގޮތުގައި ދުނިޔޭގެ އެކި ކަންކޮޅުތަކުގައި ތިބި ދަތުރުވެރިންނަށް ފޯރުކޮށްދިނުމަށް ކުރެވޭ މަސައްކަތްތަކެވެ. މި މަސައްކަތްތަކުގެ ސަބަބުން މޯލްޑިވިއަންގެ ރީޗު މުޅި ދުނިޔެއަށް ފުޅާވެގެންދާނެ ކަމީ ޝައްކެއް އޮތް ކަމެއް ނޫނެވެ.
