އޫރީދޫން އާންމުކޮށްފައިވާ އެ ކުންފުނީގެ ކުއާޓާލީ މާލީ ހިސާބުތަކަށް ބަލާއިރު، 2024 ވަނަ އަހަރުގެ ފުރަތަމަ ދެ ކުއާޓާގައި ޖުމްލަ އާމްދަނީގެ ގޮތުގައި 1.09 ބިލިއަން ރުފިޔާ ލިބިފައިވެ އެވެ. މީގެ ތެރެއިން ފުރަތަމަ ކުއާޓާގައި 554 މިލިއަން ރުފިޔާ އަދި ދެވަނަ ކުއާޓާގައި 540.7 މިލިއަން ރުފިޔާ ހިމެނެއެވެ.
އޫރީދޫގެ އާމްދަނީގެ ބޮޑު ބައެއް އަންނަނީ މޯބައިލް ހިދުމަތްތަކުންނެވެ. ފުރަތަމަ ކުއާޓާގައި މޯބައިލް އާމްދަނީގެ ގޮތުގައި 429.9 މިލިއަން ރުފިޔާ އަދި ދެވަނަ ކުއާޓާގައި 415.2 މިލިއަން ރުފިޔާ ލިބިފައިވެ އެވެ. މީގެ އިތުރުން ފިކްސްޑް ބްރޯޑްބޭންޑްއާއި އެންޓަޕްރައިސް ހިދުމަތްތަކުން ދެ ކުއާޓާގައި ޖުމްލަ 249.1 މިލިއަން ރުފިޔާ ލިބިފައިވެ އެވެ.
އޫރީދޫން މި ދެ ކުއާޓާގައި އިންކަމް ޓެކްސްގެ ގޮތުގައި ދައުލަތަށް ދައްކާފައިވަނީ 64.4 މިލިއަން ރުފިޔާ އެވެ. މިއީ އެ މުއްދަތުގައި ކުންފުންޏަށް ލިބުނު އާމްދަނީގެ 7 އިންސައްތައާ ގާތްކުރާ އަދަދެކެވެ.
ކުންފުނީގެ ހިސާބުތަކުން ދައްކާ ގޮތުގައި މި ދެ ކުއާޓާގައި ކުންފުނީގެ ހިއްސާއަކަށް 2.27 ރުފިޔާ ފައިދާގެ ގޮތުގައި ލިބިފައިވެ އެވެ.
