މި ޕްރޮގްރާމުގެ ދަށުން، އައު ވިޔަފާރި އައިޑިއާތަކާއި ސްޓާޓްއަޕްތަކަށް އެހީތެރިވުމުގެ ގޮތުން 2 ފަރާތަކަށް 5 ލައްކަ ރުފިޔާގެ ގްރާންޓެއް ދިނުމަށް ވަނީ ހަމަޖެހިފައެވެ.
މި ޕްރޮގްރާމަށް ކުރިމަތިލެވޭނީ 18 އަހަރާއި 60 އަހަރާ ދެމެދުގެ ދިވެހި ރައްޔިތުންނަށެވެ. އަދި ވިޔަފާރިތަކުގެ ތެރެއިން ރަޖިސްޓްރީ ކުރެވިފައިވާތާ 12 މަސްދުވަހަށްވުރެ ގިނަ ދުވަސް ނުވާ ވިޔަފާރިތަކަށްވެސް މި ފުރުސަތު ހުޅުވާލެވިފައިވެއެވެ.
ޕްރޮގްރާމަށް ކުރިމަތިލާ ފަރާތްތަކުގެ ތެރެއިން 10 ފަރާތެއް ޝޯޓްލިސްޓް ކުރެވި، އެ ފަރާތްތަކުން ވިޔަފާރި އައިޑިއާ ހުށަހަޅަންޖެހޭނެއެވެ. މީގެ ތެރެއިން ހޮވޭ 2 ފަރާތަކަށް 5 ލައްކަ ރުފިޔާގެ ގްރާންޓް ލިބޭނެއެވެ. މި ފައިސާ ބޭނުންކޮށްގެން 12 މަސްދުވަހުގެ ތެރޭގައި ހުށަހެޅި ވިޔަފާރި އައިޑިއާ ތަންފީޒުކުރަންވާނެއެވެ.
މީގެ އިތުރުން، ގްރާންޓް ލިބޭ ފަރާތްތަކަށް އެއް އަހަރު ދުވަހުގެ މުއްދަތަށް ބޭންކުގެ ރިލޭޝަންޝިޕް މެނޭޖަރެއްގެ އެހީތެރިކަން ފޯރުކޮށްދެވޭނެއެވެ.
މި ޕްރޮގްރާމަކީ ރާއްޖޭގައި އައު ވިޔަފާރި އައިޑިއާތައް ތަރައްގީކޮށް، ޒުވާން ވިޔަފާރިވެރިން އުފެއްދުމަށް ބީއެމްއެލްއިން އަޅާ މުހިންމު ފިޔަވަޅެއްކަމަށް އެ ބޭނުންކުން ބުނެއެވެ.
