ރައީސްގެ ވާހަކަފުޅުގައި، މުހިންމު މައްސަލަތައް ހައްލުކުރުމުގައި ބައިނަލްއަގުވާމީ އެއްބައިވަންތަކަމަށް ގޮވާލެއްވި އެވެ. ދުނިޔެއަށް މިއަދު ކުރިމަތިވެފައިވާ ގިނަ މައްސަލަތަކަކީ، ހުދު އަޅުގަނޑުމެންގެ އަމަލުތަކުން އުފެދިފައިވާ މައްސަލަތައްކަން ފާހަގަކުރައްވަމުން އެމަނިކުފާނު ވަނީ، އަޅުގަނޑުމެންނަށް ބޭނުން ވަނީ އެއްބައިވަންތަ އެކުވެރި ދައުލަތްތަކެއްކަމަށާއި، ބައިބައިވެ މާޔޫސްވެފައިވާ އދ. އެއް ނޫންކަމަށް ވިދާޅުވެފަ އެވެ.
ރައީސްގެ ވާހަކަފުޅުގައި، އދ. އިން ފަރުދީ ދިރިއުޅުމަށް ހަގީގީ ނުފޫޒު ފޯރުވަންޖެހޭނެ ކަމަށާއި، އެ ޖަމްއިއްޔާއިން ނިންމާ ނިންމުންތައް ދުނިޔޭގެ ފެންވަރުގައްޔާއި ދާހިލީ ފެންވަރުގައި ތަންފީޒުކުރުމަށް ގޮވާލެއްވި އެވެ. އެމަނިކުފާނު ވިދާޅުވީ، ދިވެހިރާއްޖެ ފަދަ ކުދި ގައުމުތަކަށް އެހީތެރިވެދޭ މަލްޓިލެޓަރަލް ނިޒާމެއް ބޭނުންވާ ކަމަށެވެ.
އދ.ގެ އާންމު މަޖިލީހުގައި ވާހަކަފުޅު ދައްކަވަމުން ރައީސް ވިދާޅުވީ ދިވެހިރާއްޖޭގެ މިސްރާބު ހުރީ އިންގިލާބީ އިގްތިސާދީ ކުރިއެރުމާ ދިމާއަށް ކަމަށާއި ނަމަވެސް ރާއްޖޭގެ ސިޔާސަތުތަކުން ނަތީޖާ ހާސިލުކުރެވޭނީ އެކަށީގެންވާ ގޮތަށް ބައިނަލްއަގްވާމީ މާލީ އެހީތެރިކަމާ އެކުގައި ކަމަށެވެ.
ރައީސް ވިދާޅުވީ މޫސުމަށް އަންނަ ބަދަލަކީ ދުނިޔެއަށް ކުރިމަތިވެފައިވާ އެންމެ ނުރައްކާތެރި ބިރުވެރިކަން ކަމަށާއި މި ޖީލުގެ އެންމެ މުހިންމު ގޮންޖެހުން ކަމަށެވެ. އެއީ އެތައް އަހަރެއްގެ ކުރިއެރުން މަދު މިނެޓުކޮޅެއްގެ ތެރޭގައި ފޮހެލައި، ގައުމުތަކަށް މޫސުމަށް އަންނަ ބަދަލުތަކާ އެއްގޮތަށް ހޭނުމަށް ގިނަ ހުރަސްތަކެއް ހުރި ކަމެއް ކަމަށް ވިދާޅުވި އެވެ. ނަމަވެސް މިކަމުގައި ރާއްޖޭން ނަމޫނާ ދައްކަމުންދާ ކަމަށް ރައީސް ވިދާޅުވި އެވެ.
އިޒްރޭލުން ހިންގަނީ ޓެރަރިޒަމްގެ އަމަލުތަކެއް ކަމަށާއި އެ ކަންކަމަށް އެގައުމު ޖަވާބުދާރީ ކުރުވަންޖެހޭ ކަމަށް ވެސް ރައީސްގެ ތަގުރީރުގައި ވަނީ ވިދާޅުވެފަ އެވެ.
ރައީސް ވިދާޅުވީ މިއަދު ދުނިޔެއަށް ކުރިމަތިވެފައިވާ ނުރައްކާތަކާއި މައްސަލަތަކަށް ބައިނަލްއަޤްވާމީ ނިޒާމެއްގެ ތެރެއިން ހައްލުތަކެއް ހޯދަންޖެހޭކަމަށެވެ. އަދި އަމަލީގޮތުން މަސައްކަތެއް ނުކޮށް، ވާހަކަތަކެއް ދައްކަން ވަގުތު ނެތްކަންވެސް ރައީސްގެ ތަގުރީރުގައި ފާހަގަކުރެއްވި އެވެ.
ރައީސް މުއިއްޒު އދގެ މަސައްކަތާއިމެދު ހިންހަމަޖެހިވަޑައިނުގެން މިފަދަ މޭރުމަކުން ވާހަކަފުޅު ދެއްކެވިއިރު، އަމިއްލަ ގައުމުގެ އާންމު ރައްޔިތުންގެ ވެލްފެއާ ނިގުޅައިގަނެގެން ބައެއް ގައުމުގެ ވެރިން ތިބޭ ކަމަށާއި ނަމަވެސް އެފަދަ ވެރިންނާއި މެދު އެޅޭނެ އެއްވެސް ފިޔަވަޅެއް ނޯންނަ ކަމަށް އދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް މިރޭ ވަނީ ވިދާޅުވެފަ އެވެ،
