މި ރިސޯޓަކީ ވާވު އަތޮޅުގައި ހެދޭ 52 ކޮޓަރީގެ ރިސޯޓެކެވެ.
އަމާން މޯލްޑިވްސްގެ ނަމުގައި ހުޅުވޭ މި ރިސޯޓުގައި 52 ކޮޓަރީގެ އިތުރުން 16 ރެސިޑެންސްވެސް ހިމެނޭނެއެވެ. މި ރިސޯޓަކީ އަމާން ބްރޭންޑުގެ 21 ވަނަ މަންޒިލެވެ. އަދި މިއީ އަމާންގެ 35 ވަނަ ޕްރޮޕަޓީވެސް މެއެވެ.
ރިސޯޓުގެ ޑިޒައިން ހަދާފައިވަނީ އަމާންއާ ގުޅިގެން ގިނަ ދުވަސްތަކެއް ވަންދެން މަސައްކަތްކުރާ ކެރީ ހިލް އާކިޓެކްޓްސްއިންނެވެ. ރިސޯޓުގެ ކޮންސެޕްޓް ވަނީ ރާއްޖޭގެ ހުދު ވެލި ގޮނޑުދޮށްތަކާއި ސާފު ކަނޑުގެ މައްޗަށް ބިނާކޮށް ފަރުމާކޮށްފައެވެ.
ރިސޯޓުގައި ހުންނާނީ އެއް ކޮޓަރިން ފެށިގެން ތިން ކޮޓަރީގެ ނިޔަލަށް ހުރި ވަކިވަކި ޕެވިލިއަންތަކެވެ. ކޮންމެ ޕެވިލިއަނެއްގައި ވެސް ޕްރައިވެޓް ސުވިމްޕޫލެއް ހުރެއެވެ. މީގެ އިތުރުން ރިސޯޓުގައި އެކި ބާވަތުގެ ރެސްޓޯރަންޓްތަކާއި، ބީޗް ކްލަބަކާއި، ޕްރައިވެޓްކޮށް ކެއުމުގެ އިންތިޒާމު ހަމަޖެހިފައިވާ ތަންތަން ހުންނާނެއެވެ.
ރިސޯޓުގެ ސްޕާ ހުންނާނީ ވަކި ރަށެއްގައެވެ. 2,638 އަކަ މީޓަރުގެ ސަރަހައްދެއްގައި ހެދޭ މި ސްޕާގައި ދެ ޕްރައިވެޓް ސްޕާ ހައުސް ވެސް ހިމެނޭނެއެވެ.
އަމާން މޯލްޑިވްސްގެ މަސައްކަތް މިހާރު ވަނީ ފެށިފައެވެ. ނަމަވެސް ރިސޯޓު ހުޅުވޭނެ ތާރީހެއް އަދި ހާމަކޮށްފައެއް ނުވެއެވެ.
