މި ބަދަލު ގެނައުމަށްޓަކައި ގާނޫނަށް ގެންނަންޖެހޭ އިސްލާހުތައް މި ހަފުތާގެ ތެރޭގައި ރައްޔިތުންގެ މަޖިލީހަށް ފޮނުވުމަށް ވަނީ ނިންމާފައެވެ.
ރައީސް މުއިއްޒުގެ ރަސްމީ އެކައުންޓުން އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި، މި އިސްލާހުތަކުގެ ތެރޭގައި އެކްސްޕޯޓް އިމްޕޯޓްގެ ގާނޫނުގެ 7 ވަނަ މާއްދާގެ ޗެޕްޓާ 24 ގެ ދަށުން ސިގިރެޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް 3 ރުފިޔާއިން 8 ރުފިޔާއަށް މަތިކުރުމާއި، މި މުދަލުން ނެގޭ އެޑްވަލޮރަމް ރޭޓް 50 ޕަސަންޓު މަތިކުރުން ހިމެނެއެވެ.
މީގެ އިތުރުން، އާންމު ތަންތަނުގައި ދުންފަތުގެ އިސްތިއުމާލުކުރުން ހުއްޓުވުމަށް ތަންފީޒީ އިދާރާތަކުގެ ދައުރު ވަރުގަދަ ކުރުމަށް ހާއްސަ ފިޔަވަޅުތަކެއް އަޅަން ވެސް ވަނީ ނިންމާފައެވެ. އަދި ދުންފަތުގެ އިސްތިއުމާލު ކުރަން އާދަވެފައިވާ މީހުން އެ އާދައިން ދުރުވެގަތުމަށް އެހީތެރިވުމަށް ގައުމީ ފެންވަރުގައި ބޮޑު ކެމްޕޭނެއް ފެށުމަށް ވެސް ރައީސް ވަނީ ނިންމަވާފައެވެ.
ރައީސް މުއިއްޒު އެދިވަޑައިގެންފައިވަނީ ދުންފަތުގެ އިސްތިއުމާލުކުރުމުން ދުރުހެލިވެފައިވާ މުޖުތަމައަކަށް ދިވެހިރާއްޖެ ހެދުމަށް ހުރިހާ ރައްޔިތުންގެ އެއްބާރުލުމާއި އެހީތެރިކަން ދިނުމަށެވެ. މި ފިޔަވަޅުތަކަކީ ދުންފަތުގެ އިސްތިއުމާލު ކުރުން މަދުކޮށް، ރައްޔިތުންގެ ސިއްހަތު ރައްކާތެރިކުރުމަށް އެޅޭ މުހިންމު ފިޔަވަޅުތަކެއްކަމަށް ސަރުކާރުން ބުނެއެވެ.
