އަންނަ އަހަރުގެ ޖަނަވަރީ 17 ގައި ގަތަރުގައި ބޭއްވުމަށް ހަމަޖެހިފައިވާ މި މެރެތަންގައި ބައިވެރިވުމަށް ޝައުގުވެރިވާ ފަރާތްތަކަށް އުރީދޫގެ ވެބްސައިޓް މެދުވެރިކޮށް އެޕްލައި ކުރެވޭނެ އެވެ. އެޕްލިކޭޝަން ހުށަހެޅުމުގެ މުއްދަތު ހަމަވާނީ މަހެއްހާ ދުވަހުގެ ތެރޭގައެވެ.
އުރީދޫން ބުނީ މި ފުރުސަތަށް އެދި ހުށަހަޅާ ފަރާތްތަކުގެ ތެރެއިން ނަސީބުވެރި ދެ ފަރާތަކަށް މެރެތަންގައި ބައިވެރިވުމުގެ ފުރުސަތު ލިބިގެންދާނެ ކަމަށެވެ. ނަމަވެސް މި ފުރުސަތަށް އެދި ހުށަހަޅާ ފަރާތްތަކަކީ މަދުވެގެން އެއް އަހަރު ދުވަހު އުރީދޫގެ ކަސްޓަމަރުންގެ ގޮތުގައި ތިބި ބައެއް ކަމުގައި ވާންޖެހެއެވެ.
މީގެ އިތުރުން ހާފް މެރެތަން ނުވަތަ ފުލް މެރެތަން ދުވުމުގެ ގާބިލުކަން ހުރި މީހަކަށް ވާންޖެހޭނެ ކަމަށާއި، މީގެ ކުރިން މިފަދަ މެރެތަނެއްގައި ބައިވެރިވެފައިވާ މީހަކަށް ވާންޖެހޭނެ ކަމަށް އުރީދޫން ބުންޏެވެ. އަދި ގަތަރަށް އެތެރެވުމުގެ ޝަރުތުތައް ފުރިހަމަވާ ދިވެހި ޕާސްޕޯޓެއް އޮތުމަކީ ވެސް މުހިންމު ކަމެކެވެ.
