މި ހަފްތާގައި ބަޖެޓު ހުށަހަޅަން ނިންމާފައިވާއިރު، އެކި ބާވަތުގެ ޓެކްސްތައް ބޮޑުކުރުމަށް ހުށަހަޅާ ގާނޫނުތަކުގެ އިސްލާހުތައް މިހާރު ދަނީ މަޖިލީހުގެ ކޮމިޓީތަކުން ދިރާސާކުރަމުންނެވެ.
ބަޖެޓާއެކު ހުށަހަޅާ އިސްލާހުތަކުގެ ތެރޭގައި ޓީޖީއެސްޓީ 16 ޕަސަންޓުން 17 ޕަސަންޓަށް ބޮޑުކުރުން ހިމެނެއެވެ. އަދި އެއާޕޯޓް ޑިވެލޮޕްމަންޓް ފީ އާއި ޑިޕާޗާ ޓެކްސްވެސް ބޮޑުކުރުމަށް ވަނީ ހުށަހަޅާފައެވެ. މީގެ އިތުރުން ގްރީން ޓެކްސް އާއި ވޭޕް ކުރުމަށް ބޭނުންކުރާ އާލާތްތަކާއި އިލެކްޓްރިކް ސިނގިރޭޓުން ނަގާ އިމްޕޯޓް ޑިއުޓީވެސް ބޮޑުކުރުމަށް ވަނީ ހުށަހަޅާފައެވެ.
މި އަހަރަށް މަޖިލީހުން ފާސްކުރި 49.5 ބިލިއަން ރުފިޔާގެ ބަޖެޓަށް އިތުރު 5.1 ބިލިއަން ރުފިޔާގެ ސަޕްލިމެންޓްރީ ބަޖެޓެއް ވަނީ ހުށަހަޅާފައެވެ. އަންނަ އަހަރުގެ ބަޖެޓުގެ ތަފުސީލު އަދި ހާމަކޮށްފައި ނުވިޔަސް، ޓެކްސްތައް ބޮޑުކުރުމަށް ހުށަހަޅާފައިވާ އިސްލާހުތަކަށް ބަލާއިރު، އަންނަ އަހަރުގެ ބަޖެޓު މި އަހަރަށްވުރެ ބޮޑުވާނެ ކަމަށް ލަފާކުރެވެއެވެ.
ގާނޫނު އަސާސީގައިވާ ގޮތުން، އަންނަ އަހަރަށް ލަފާކުރާ ދައުލަތުގެ ބަޖެޓު މި އަހަރުގެ އޮކްޓޯބަރު މަސް ނިމުމުގެ ކުރިން މަޖިލީހަށް ހުށަހަޅަން ޖެހެއެވެ.
