އޮޑިޓާ ޖެނެރަލް އޮފީހުން ދިން ލަފާގައި ބުނެފައިވަނީ މިހާރު ހުށަހަޅާފައިވާ ސަޕްލިމެންޓަރީ ބަޖެޓާ އެކު މި އަހަރުގެ ތެރޭގައި ދައުލަތުގެ ދަރަންޏަށް 21.8 ބިލިއަން ރުފިޔާ އިތުރުވެގެންދާނެ ކަމަށެވެ. މިއީ ގައުމީ އުފެއްދުންތެރިކަމުގެ ނިސްބަތުން 117.2 ޕަސަންޓެވެ.
ފިނޭންސް މިނިސްޓްރީން ހާމަކުރި ގޮތުގައި 2023 ވަނަ އަހަރު ނިމުނުއިރު ދައުލަތުގެ ޖުމުލަ ދަރަނި ހުރީ 126.1 ބިލިއަން ރުފިޔާގަ އެވެ. އަދި މިހާރު ހުށަހަޅާފައިވާ ސަޕްލިމެންޓަރީ ބަޖެޓުގައި އިތުރު 4.3 ބިލިއަން ރުފިޔާ ހޯދަން ހިމަނާފައިވެ އެވެ.
އޮޑިޓާ ޖެނެރަލް އޮފީހުން ބުނީ ބަޖެޓު ފައިނޭންސް ކުރަން އެތެރޭގެ ބާޒާރަށް ބަރޯސާވާ މިންވަރު އަހަރުން އަހަރަށް އިތުރުވަމުންދާއިރު، އެކަމުން އަމިއްލަ ވިޔަފާރިތަކަށާއި އިގްތިސާދަށް ކުރާނެ އަސަރު ދެނެގަތުން މުހިންމު ކަމަށެވެ.
ސަޕްލިމެންޓަރީ ބަޖެޓުގައި ހިމަނާފައިވާ ފައިނޭންސިންގެ 66.6 ޕަސަންޓަކީ ރާއްޖެއިން އަދި ބާކީ 33.3 ޕަސަންޓަކީ ބޭރުން ހޯދަން ހުށަހަޅާފައިވާ އަދަދުތަކެވެ.
