މީގެ އިތުރުން 12،000 ރުފިޔާއަށް ވުރެ ދަށުން މުސާރަ ލިބޭ މުވައްޒަފުން ވެސް މި ބަދަލުން އިސްތިސްނާ ވާނެ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވިއެވެ.
މާލިއްޔަތު ކޮމިޓީގައި މައުލޫމާތު ދެއްވަމުން ޒަމީރު ވިދާޅުވީ އިންޖިނިއަރުން ފަދަ ފަންނީ މުވައްޒަފުންގެ މުސާރަ ކުޑަކޮށްފި ނަމަ، އެ މީހުންނަށް އެހެން ވަޒީފާތަކަށް ދިއުމުގެ ފުރުސަތު އޮތުމުން، ކުންފުނިތައް ހިންގުމަށް ދަތިވެދާނެއެވެ.
ސަރުކާރުގެ ހަރަދު ކުޑަކުރުމުގެ ގޮތުން އަޅާ ފިޔަވަޅުތަކުގެ ތެރޭގައި ސަރުކާރު ހިއްސާވާ ކުންފުނިތަކުގެ މުވައްޒަފުންނަށް އެންމެ ގިނަވެގެން ދެވޭނީ 90،000 ރުފިޔާ ކަމަށް ވެސް ކަނޑައަޅައިފައިވެއެވެ. އަދި ސަރުކާރު ކުންފުނިތަކުން ދައުލަތަށް ބަރޯސާވުން ހުއްޓާލުމަށް ވަކި ލަނޑުދަނޑިތަކެއް ކަނޑައަޅައިފައިވާ ކަމަށް ޒަމީރު ވިދާޅުވި އެވެ.
މި ބަދަލުތައް ގެންނަނީ ދައުލަތުގެ މާލީ ހާލަތު ރަނގަޅު ކުރުމަށް ސަރުކާރުން އަޅަމުންދާ ފިޔަވަޅުތަކުގެ ތެރެއިން ކަމަށް ފިނޭންސް މިނިސްޓްރީން ބުނެފައިވެ އެވެ.
