މި ބްރޭންޑަކީ އައްޑޫ ސިޓީ ކައުންސިލުން އިސްނަގައިގެން އެންކްރިއާ ސްޓޫޑިއޯއާ ހަވާލުކޮށްގެން ތައްޔާރުކޮށްފައިވާ ބްރޭންޑެކެވެ.
އައްޑޫ ސިޓީގެ ކެނެރީފުގައި ބޭއްވި ރަސްމިއްޔާތުގައި ޓޫރިޒަމް މިނިސްޓަރު އިބްރާހިމް ފައިސަލް، އައްޑޫ ސިޓީގެ މޭޔަރު އަލީ ނިޒާރު އަދި ސަރުކާރުގެ އިސް ބޭފުޅުން ބައިވެރިވި އެވެ. މި ރަސްމިއްޔާތުގައި އައްޑޫ ސިޓީގެ ރީތިކަން ދައްކުވައިދޭ ވީޑިއޯއެއް ވެސް ވަނީ ދައްކާލާފަ އެވެ.
އެންކްރިއާ ސްޓޫޑިއޯގެ އާޓް ޑިރެކްޓަރު އަބްދުﷲ ޝަފީއު ވިދާޅުވީ ބްރޭންޑުގެ ލޯގޯ ފަރުމާކޮށްފައިވަނީ އީކުއޭޓަރާއި އައްޑޫގެ އަތޮޅުގެ ސިފަ ގުޅުވައިލައިގެން ކަމަށެވެ. އަދި އައްޑޫގެ މޫދުގެ ކުލަތައް ކަމަށްވާ ފެހި އަދި ނޫކުލަ ބޭނުންކޮށްގެން ލޯގޯ ފަރުމާކޮށްފައިވާ ކަމަށް އޭނާ ވިދާޅުވި އެވެ.
އައްޑޫ ސިޓީގެ މޭޔަރު އަލީ ނިޒާރު ވިދާޅުވީ މި ބްރޭންޑުގެ ސަބަބުން އައްޑޫ ސިޓީ ޓޫރިޒަމް މަންޒިލެއްގެ ގޮތުގައި ކުރިއަރުވަން ފަސޭހަވެގެންދާނެ ކަމަށެވެ. އަދި މިކަމުގައި އެންމެންގެ އެއްބާރުލުން ބޭނުންވާ ކަމަށް ވެސް އޭނާ ވިދާޅުވި އެވެ.
