މިދިޔަ މަހުގެ 31ގައި އެމްއެމްސީން ދިން ނޫސްވެރިކަމުގެ އެވޯޑާއި ގުޅިގެން އޭސީސީން މޯލްޑިވްސް މީޑިއާ ކައުންސިލަށް ވަދެ ތަހުގީގު ފެށީ އިއްޔެއެވެ. މި މައްސަލައިގައި ތުހުމަތު ކުރެވެނީ އޯޑިއޯ/ވީޑިއޯ ކެޓަގަރީގެ ތަހުގީގީ ދާއިރާއިން "އަދަދު" އޮންލައިންގެ "ސްކީލާން" ޑޮކިއުމެންޓްރީއަށް ދިން އެވޯޑާ ގުޅޭ ގޮތުންނެވެ.
މި މައްސަލާގައި އޭސީސީން އެމްއެމްސީއަށް ވަދެ ގެންގޮސްފައިވަނީ އެވޯޑްތަކުގެ މާކްސް ޝީޓްތަކެވެ. އެހެންނަމަވެސް މި މައްސަލައާއި ގުޅިގެން އޭސީސީން އަދި ވަކި އެއްޗެއް ހާމައެއް ނުކުރެއެވެ.
ނޫސްވެރިކަމުގެ އިނާމުގެ އިންސާފުވެރިކަމާ ގުޅުވައި އެވޯޑުގެ ފަނޑިޔާރުންގެ ނެރުނު ބަޔާން ދޮގުކޮށް އެމްއެމްސީން އެ ފަނޑިޔާރުންނަށް ރައްދުދީ އެމްއެމްސީން ވަނީ ރޭ ބަޔާނެއްވެސް ނެރެފައެވެ.
އެމްއެމްސީން ރޭ ނެރުނު ބަޔާނެއްގައި ބުނީ އެވޯޑްތަކަށް ފަނޑިޔާރުކަން ކުރި ފަނޑިޔާރުން ނެރުނު ލިޔުމުއްގައި ނޫސްވެރިކަމުގެ އިނާމުގެ އިންސާފުވެރިކަމާއި ކައުންސިލްގެ މިނިވަންކަމާއި މެދު ހަގީގަތާއި ހިލާފު ބޮޑެތި ތުހުމަތުތަކެއް ކޮށްފައިވާކަމަށެވެ. އެއްވެސް ދާއިރާއަކުން އެވޯޑް ދިނުމުގައި އިނާމު ދިނުމުގެ އުސޫލާއި ހިލާފަށް އެއްވެސް ކަމެއް އެ ކައުންސިލުން ކޮށްފައި ނުވާނެކަަމަށް އެމްއެމްސީގެ ބަޔާނުގައިވެއެވެ.
