މި މަޝްރޫއުގެ އަގަކީ 6.6 މިލިއަން ޑޮލަރެވެ.
ސައުދީ ފަންޑު ފޯ ޑިވެލޮޕްމަންޓުގެ ލޯނު އެހީގައި ކުރިއަށް ގެންދާ މި މަޝްރޫއުގެ އެއްބަސްވުމުގައި ސޮއިކުރީ ރައީސް އޮފީހުގައި އެވެ. ސަރުކާރުގެ ފަރާތުން ސޮއިކުރެއްވީ މަސްވެރިކަމާއި ކަނޑުގެ ވަސީލަތްތަކާ ބެހޭ މިނިސްޓަރު އަހުމަދު ޝިޔާމެވެ. އަދި ކުންފުނީގެ ފަރާތުން ސޮއިކުރީ މެނޭޖިންގ ޑިރެކްޓަރ އާޝިޝް އޮބަރޯއި އެވެ.
މި މަޝްރޫއުގެ ދަށުން ކޫއްޑޫގައި އިތުރު 4،000 ޓަނުގެ ކޯލްޑް ސްޓޯރޭޖެއް ގާއިމުކުރެވޭނެ އެވެ. މިހާރު ކޫއްޑޫގައި ހުރީ 2،000 ޓަނުގެ ކޯލްޑް ސްޓޯރޭޖެކެވެ. މި މަޝްރޫއު ނިމުމުން ކޫއްޑޫގެ ކޯލްޑް ސްޓޯރޭޖްގެ ޖާގަ 6،000 ޓަނަށް އިތުރުވާނެ އެވެ.
މަސްވެރިކަމާ ބެހޭ މިނިސްޓަރު ވިދާޅުވީ މިހާރު ރާއްޖޭގައި ހުރީ 8،500 ޓަނުގެ ކޯލްޑް ސްޓޯރޭޖް ކެޕޭސިޓީ ކަމަށާއި ސަރުކާރުގެ އަމާޒަކީ އެ އަދަދު ތިން ގުނަ ކުރުން ކަމަށެވެ. އެގޮތުން މުޅި ރާއްޖޭގެ ކޯލްޑް ސްޓޯރޭޖް ކެޕޭސިޓީ 25،000 ޓަނަށް އިތުރުކުރުމަށް ވަނީ ރާވައިފަ އެވެ.
