އުއްޗު، އެމްއެމްއޭ އަށް ފޮނުއްވި ސިޓީއެއްގައި ވަނީ ރިސޯޓުތަކަށް އަންނަ ފަތުރުވެރިއެއްގެ ބޮލަކަށް 500 ޑޮލަރުގެ ރޭޓުން ރާއްޖޭގެ ބޭންކްތަކުން ޑޮލަރު މާރުކުރުމަކީ ވިޔަފާރިތަކަށް ބޮޑު ގެއްލުމަކާ ކުރިމަތިވެދާނެ ކަމެއް ކަމަށެވެ. ފަތުރުވެރިކަމުގެ ދާއިރާގެ ވިޔަފާރިތަކަށް ހާއްސަކޮށްގެން މިފަދަ ފިޔަވަޅެއް އެޅުމަކީ ވަރަށް ބޭ އިންސާފު ކަމެއް ކަމުގައި އެ ސިޓީގައިވެ އެވެ.
ގަވާއިދަށް ތައްޔާރުވުމަށް ވަގުތު ނުދީ ގަވާއިދު ގެޒެޓް ކުރި ދުވަހުން ފެށިގެން އަމަލުކުރަން ފެށުމަކީ ވެސް އުއްޗުގެ ކަންބޮޑުވުމެކެވެ.
އާ ގަވާއިދުގެ ސަބަބުން އިންވެސްޓަރުންގެ އިތުބާރު ގެއްލި، ޓޫރިޒަމް ދާއިރާގެ އިންވެސްޓަރުންނަށް އަސަރުކޮށް، އެކަމުގެ އަސަރު އިގްތިސާދު ކުރުމުގެ ފުރުސަތު އެބަ އޮތް ކަމަށް ވެސް އެ ސިޓީގައި އުއްޗު ވިދާޅުވެފައިވެ އެވެ.
ބޭރު ފައިސާ އާ ބެހޭ އާ ގަވައިދަކީ ކަމާބެހޭ ފަރާތްތަކާ އެއްވެސް މަޝްވަރާކުރުމެއް ނެތި ވަރަށް ކުއްލިއަކަށް ތަޢާރުފު ކުރެވުނު ގަވައިދެއް ކަމީ އިންތިހާ އަށް ކަންބޮޑުވާ ކަމެއް ކަމަށް ސިޓީގައި ފާހަގަ ކުރައްވާފައިވެ އެވެ.
ރިސޯޓުތަކަށް ލިބޭ ޑޮލަރު ރާއްޖޭގެ ބޭންކްތަކުން މާރުކުރަން ޖެހޭ ގޮތަށް ލާޒިމްކުރި ގަވާއިދަށް ސަސްޕެންޑް ކުރުމަށް ޓޫރިޒަމް ދާއިރާގައި ރާއްޖޭގެ އެންމެ ބޮޑު އެއް ވިޔަފާރިވެރިޔާ ކަމަށްވާ ޗަމްޕާ ބްރަދާސްގެ ވެރިޔާ އުއްޗު ސަރުކާރާއި އެމްއެމްއޭގައި އެދިވަޑައިގެންނެވިއިރު، ރާއްޖޭގައި އޮޕަރޭޓްކުރާ އެއް ރިސޯޓު ފިޔަވައި އެހެން ހުރިހާ ރިސޯޓަކުން އާ ގަވައިދަށް އަމަލުކުރަން ރަޖިސްޓަރީ ވެއްޖެ ކަމަށް މަރުކަޒީ ބޭންކުން ވަނީ ބުނެފަ އެވެ.
- އިތުރަށް ކިޔާލަން: ޑޮލަރު މާރުކުރަން 173 ރިސޯޓެއް އެމްއެމްއޭގައި ރަޖިސްޓްރީ ވެއްޖެ
އެ ގަވައިދަށް ރެޖިސްޓާ ނުވާ ރިޒޯޓާ ގުޅޭ މައުލޫމާތެއް އެ ބޭންކުން ހާމައެއް ނުކުރެއެވެ.
އެމްއެމްއޭ އިން ބުނީ ގަވާއިދާ ގުޅިގެން ބައެއް ރިސޯޓުތަކުން ޝަކުވާ ހުށަހަޅާފައިވާ ކަމަށެވެ. ނަމަވެސް، އަދި ޝަކުވާ ހުށަހެޅި ރިސޯޓުތަކުގެ އަދަދު ސާފެއް ނުވެ އެވެ.
މި ގަވާއިދަށް އަމަލުކުރަން ފެށީ މިދިޔަ އޮކްޓޫބަރު މަހުގެ އެއްވަނަ ދުވަހުން ފެށިގެންނެވެ. މި ގަވާއިދުގެ ދަށުން، ބޭރު ފައިސާއިން ލިބޭ އާމްދަނީ ޑިޕޮސިޓް ކުރުމަށް، އަލަށް ޓޫރިޒަމް ދާއިރާގައި ހަރަކާތްތެރިވާ ފަރާތްތަކަށް ރަޖިސްޓަރީވުމަށް 30 ދުވަހުގެ މުއްދަތެއް ލިބިގެންދާނެ ކަމަށް އެމްއެމްއޭއިން ބުނެ އެވެ.
އެ ގަވާއިދުގެ ދަށުން ޑޮލަރު މާރުކުރަން ފަށަން ޖެހޭނީ އަންނަ ޖެނުއަރީ މަހުގެ ފަހުކޮޅުން ފެށިގެންނެވެ. ޖެނުއަރީގައި ބޭންކަށް މާރުކުރާނީ އޮކްޓޫބަރު މަހު ރިސޯޓަކަށް އައި ޓޫރިސްޓުންގެ ބޮލަކަށް ޖެހޭ އަދަދުގެ ނިސްބަތުންނެވެ.
އެމްއެމްއޭ އިން މިހާރު އަމަލުކުރަން ފަށާފައިވާ ގަވައިދުގައިވާ ގޮތުން ފަތުރުވެރިކަމުގެ ދާއިރާގައި ޓީޖީއެސްޓީ ދައްކާ ފަރާތްތަކުން ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރުކުރަން ޖެހެ އެވެ.
އެގޮތުން ކެޓަގަރީ "އޭ" ގައި ހިމަނާފައިވަނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ. މިކެޓަގަރީގެ ތަނަކުން ހިދުމަތް ހޯދާ ކޮންމެ ޓޫރިސްޓަކަށް ބޮލަކަށް 500 ޑޮލަރުގެ ރޭޓުން އެ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ޖަމާކުރަން ޖެހެ އެވެ.
ކެޓަގަރީ "ބީ" ގައި ހިމެނެނީ ރާއްޖޭގައި މިހާރު އިތުރުވަމުންދާ ގެސްޓް ހައުސްތަކެވެ. މިތަންތަނުގައި ހުންނަ ގެސްޓުހައުސްތަކާއި އެ ރަށްރަށުގައި ހުންނަ ހޮޓާތަކުގެ ތެރެއިން 50 ކޮޓަރިއަށް ވުރެ މަދު އަދަދެއްގެ ކޮޓަރި ހުންނަ ތަންތަނުން މާރުކުރަން ޖެހެނީ ޓޫރިސްޓަކަށް 25 ޑޮލަރު ރޭޓުންނެވެ.
މިގޮތަށް މިކަން ކުރަން ޖެހޭނީ ކޮންމެ މަހެއް ނިމި 87 ދުވަހުގެ ކުރިން ކަމަށްވެސް ގަވައިދުގައިވެ އެވެ.
