ކޮންސްޓްރަކްޝަން މިނިސްޓްރީގެ ޓެކްނިކަލް ޓީމުން މާލެ އަދި ވިލިމާލޭގެ މަގުތަކުގެ ހާލަތު ދެނެގަތުމަށްޓަކައި މި ބައްދަލުވުން ބާއްވާފައި މިވަނީ އެމްއެންޑީއެފް، އާރްޑީސީ އަދި މޯލްޑިވްސް ޕޮލިސް ސަރވިސްގެ ވެސް ބައިވެރިވުމާއެކުއެވެ.
އެގޮތުން މި ބައްދަލުވުމުގައި މަޝްވަރާކުރި ޗައިނާގެ މާހިރުންގެ ޓީމަކީ ޗައިނާ ސަރުކާރުން މަގުހެދުމުގެ މަޝްރޫއުއަށް އައްޔަންކޮށްފައިވާ ބައެކެވެ.
މި ބައްދަލުވުންތަކަކީ މާލެ އަދި ވިލިމާލޭގެ މަގުތައް އަލުން ތަރައްގީކުރުމުގެ މަޝްރޫއުގެ ދަށުން ކުރިއަށްގެންދާ މަސައްކަތްތަކުގެ ތެރެއިން ބޭއްވުނު ބައްދަލުވުންތަކެއް ކަމަށްވާއިރު މި މަޝްރޫއުގެ ފީސިބިލިޓީ ސްޓަޑީ 2024 ވަނަ އަހަރުގެ ނޮވެމްބަރު 21 ވަނަ ދުވަހާ ހަމައަށް ކުރިއަށްދާނެކަމަށް މިނިސްޓްރީން މައުލޫމާތު ދެއެވެ.
މި މަޝްރޫއުގެ ދަށުން މާލެ އަދި ވިލިމާލޭގެ މަގުތަކުގެ މިހާރުގެ ހާލަތު ދެނެގަނުމުގެ އިތުރުން އެ މަގުތައް އަލުން ތަރައްގީކުރުމަށް ބޭނުންވާ ކަންކަން ފާހަގަކުރެވޭނެއެވެ. އަދި މަގުތަކުގެ ސަލާމަތާއި ރައްކާތެރިކަން އިތުރުކުރުމަށް އެޅިދާނެ ފިޔަވަޅުތަކާއި ގުޅޭގޮތުންވެސް މަޝްވަރާކުރެވޭނެ ކަމަށް ކޮންސްޓްރަކްޝަން މިނިސްޓްރީން ބުނެއެވެ.
މާލެ އަދި ވިލިަމާލެ މަގުހެދުމުގެ މި މަޝްރޫއަކީ ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދިއުމަށް ހަމަޖެހިފައިވާ ޕްރޮޖެކްޓެކެވެ.
