މަސްތުވާތަކެތީގެ ބާވަތެއް ކަމަށްވާ ކަމަށްވާ ކެނެބިސް އަޅާފައިވާ ވޭފް ޝިޕްމެންޓެއް ކަސްޓަމަސް އިން ހިފަހައްޓާފައިވާކަމަށް ހޯމް މިނިސްޓަރު އިހްސާން ވިދާޅުވީ މިދިޔަ މަހުގެ 15 ވަނަދުވަހުގެ ރެއެވެ. ވައިގެ މަގުން އެތެރެކުރި އެ ސިޕްމަންޓް ހިފެހެއްޓިކަމަށް ހޯމް މިނިސްޓަރު ވިދާޅުވީ ވޭފް ރާއްޖޭގައި މަނާކުރަން ނިންމިކަން ރައީސް ޑރ. މުއިއްޒު އިއުލާން ކުރެއްވިތާ މާގިނައިރުތަކެއް ނުވަނީސް އެވެ.
އެހެންނަމަވެސް ފުލުހުން އިއްޔެ ބުނީ ޑްރަގު އަޅާފައި ހުރިކަމަށް ބުނެ ހިފެހެއްޓި ވޭޕް އޮއިލް ޝިޕްމެންޓުގައި ޑްރަގުގެ އެއްވެސް ބާވަތެއް ނެތްކަމަށެވެ. މިކަމާއި ގުޅިގެން މިނިސްޓަރު އިހްސާނަށް ފާޑުކިޔުންތައް ވަނީ އަމާޒުވެފައެވެ.
އެކަމާއި ގުޅިގެން މިނިސްޓަރު އިހްސާން އެކްސްގައި ކުރެއްވި ޕޯސްޓެއްގައި ވިދާޅުވީ އެއާޕޯޓުގައި ކަސްޓަމްސްއަށް ޝައްކު ކުރެވޭ ޕެކޭޖުތަކާއި އައިޓަމްތަކުގެ ރެޕިޑު ޓެސްޓު ކުރާ ކަމަށެވެ. މިގޮތުން، އެތަކެތި ޕޮޒިޓިވް ވާނަމަ ހިފަހައްޓާ، ތަހުގީގަށް ހަވާލުކުރާ ކަމަށް އިހްސާން ވިދާޅުވިއެވެ. އެގޮތުން ވޭޕް ޝިޕްމަންޓް ޕޮޒިޓިވްވިކަަމަށް އިހްސާް ވިދާޅުވިއެވެ.
މިނިސްޓަރު އިހްސާން ވިދާޅުވީ އާއްމު އުސޫލުން މި ތަކެތި ތަހުގީގަށް ފުލުހުންނާއު ހަވާލުކުރެވި ލެބޯޓަރީ ޓެސްޓް ހަދާކަމަށެވެ. އަދި އެ ޓެސްޓްގެ ނަތީޖާ އާއްމުކޮށް ދެ ދުވަހާއި ހަތް ދުވަސް ނަގާކަމަށާއި މި ޓެސްޓްގެ ނަތިޖާއާއި ރެޕިޑް ޓެސްޓް ނަތީޖާ ދިމާނުވެއްޖެނަމަ އިތުރުރަށް ޔަގީންކުރަން ކޮންފާމަޓަރީ ޓެސްޓްތައް ހަދާކަމަށްވެސް މިނިސްޓަރު އިހްސާން ވިދާޅުވިއެވެ.
ޑްރަގު ހުރިކަމަށް ބުނާ ވޭޕް ސިޕްމަންޓްގެ ވެރި ފަރާތުގެ މައުލޫމާތު ހޯދަން އެދުވަހު މީޑިއާތަކުން އެދުމުން އެކަން ހާމަނުކުރީ ލެބޯޓަރީ ޓެސްޓްގެ ނަތީޖާ އެހާތަނަށް ލިބިފައި ނުވާތީކަމަށްވެސް މިނިސްޓަރު ވިދާޅުވިއެވެ.
މިިނިސްޓަރު ވިދާޅުވީ އެ ވޭޕްގެ އެޝިޕްމަންޓު ހިފެހެއްޓި ވާހަކަ ހިއްސާކުރަން ނިންމީ މިއަހަރު މިފަދަ އެތައް ކޭސްތަކެއް ހިނގައިފައިވުމާއި މިދިޔަ އަހަރު ވެސް މިފަދަ ވޭޕް އޮއިލް ޝިޕްމަންޓެއްގައި ކެނަބިސް ހުރި ކަމަށް ޔަގީންކުރެވިފައިވުމުން މި ކަމަކީ މުޖުތަމައުގެ ކަންބޮޑުވުން އޮތް މައްސަލައެއްކަމަށް ވީމާކަމަށެވެ.
ވޭޕް ޝިޕްމަންޓްގައި ޑްރަގު ނެތްކަމަށް ފުލުހުން ހާމަކުރި މައުލުމާތުން އެނގިގެންދަނީ މި ޕްރޮސެސްގެ ހާމަކަން ބޮޑުކަމާއި އިންސާފުވެރިކަން ކަމަށްވެސް އިހުސާން ވިދާޅުވިއެވެ. އަދި ރައްޔިތުންގެ ސަލާމަތާއި ރައްކާތެރިކަމަކީ އެންމެ އިސްކަންދޭ ކަންކަން ކަމަށާއި ކުރިއަށް އޮތް ތަނުގައި ވެސް އަމަލު ކުރާނީ އެ އުސޫލުން ކަމަށް މިނިސްޓަރު އިހްސާން ވިދާޅުވިއެވެ.
