ކުރިން ފިނޭންސް މިނިސްޓަރުކަން ކުރެއްވި މުނައްވަރު ވިދާޅުވީ ފޮރިން އެކްސްޗޭންޖު ބިލުގެ މަސައްކަތް އެންމެ ފުރަތަމަ ފެއްޓެވީ ރައީސް ނަޝީދުގެ ވެރިކަމުގައިކަމަށެވެ. އޭގެފަހުން ކޮންމެ ވެރިކަމެއްގައި ވެސް މި މަސައްކަތް ކުރަމުން ގެންގޮސްފައިވާކަމަށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ފިނޭންސް މިނިސްޓަރުގެ މަގާމުގައި ހުންނެވި މުނައްވަރަކީ މީގެ ކުރިން އެމްއެމްއޭގައި 10 އަހަރު ވަންދެން ހިދުމަތް ކުރެއްވި ބޭފުޅެކެވެ.
ނަމަވެސް މިވެރިކަމުގައި މި ބިލުގެ މަސައްކަތް އަލުން އިސްކަމެއް ދީގެން މުހިންމު ބައެއް ބަދަލުތަކާއެކުފެށިއެވެ. އެ މަސައްކަތް އަވަސްކުރަންޖެހުނީ ބޭންކުތަކަށް ބޭރު ފައިސާ ވަންނަ މިންވަރު ދަށްވެފައިވާތީއެވެ.
އެމްއެމްއޭއިން ބުނަގޮތުން ކޮވިޑުގެކުރިން 20 ޕަސަންޓު ވަރު ބޭރު ފައިސާ ދިވެހި ބޭންކުތަކަށް ޓޫރިޒަމް އިންޑަސްޓްރީން ވަނަސް މިހާރު ވަންނަނީ އެންމެ ތިން ޕަސަންޓެވެ.
- ޓޫރިޒަމް އިންޑަސްޓީން ދިވެހި ބޭންކުތަކަށް ބޭރު ފައިސާ ވަންނަނީ އެންމެ ތިން ޕަސަންޓަށް
- ބޭންކިން ނިޒާމުގެ ތެރެއަށް ޑޮލަރު ވަނުން މުހިންމު.
- ކޮވިޑުގެ ކުރިން ބޭންކުތަކަށް ޓޫރިޒަމް އިންޓަސްޓްރީގެ 20 އިންސައްތަ ބޭރު ފައިސާ ވަންނަމުން ދިޔަ
ސަރުކާރުން ހުށަހަޅާފައިވާ އާބިލުގައި ބުނަނީ ކީކޭ؟
ފަތުރުވެރިކަމުގެ ދާއިރާއަށް ލުއިތަކެއް ދީ ބޭރު ފައިސާ އާއި ބެހޭ ބިލު ހިޔާލަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ވަނީ ހުޅުވާލައިފައެވެ.
ބިލުގައި ބުނަނީ، ރިސޯޓުތައް ހިމެނޭ ކެޓަގަރީ އޭގެ ޓޫރިސްޓު ފެސިލިޓީތަކުން ޑޮލަރު މާރުކުރަން ޖެހޭނީ ބޭރުފައިސާގެ އާމްދަނީން %25 އަށް ވުރެ ބޮޑުނުވާ ގޮތަށް ކަމަށެވެ.
މީ ގެކުރިން ގަވާއިދު އޮތް ގޮތުން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރަން ޖެހޭނެ އެވެ. އޭރު އޮތް ގޮތުން މާރުކުރަން މަޖުބޫރުކުރުވާއިރު ރިސޯޓުގެ އާމްދަނީއަށް ބިނާކޮށް އެއްވެސް އިސްތިސްނާއެއް ނުލިބެ އެވެ.
މިހާރު އޮތް ގަވައިދާ ގުޅޭ ގޮތުން ޓޫރިޒަމް ދާއިރާއިން ފާޅުކުރާ ކަންބޮޑުވުންތަކާ ގުޅުން ހުރި ބައެއް ބަދަލުތައް ބިލުގައިވެ އެވެ. އޭގެ ތެރެއިން އެއް ކަމަކީ އަހަރެއްގެ ތެރޭގައި 20 މިލިއަން އެމެރިކާ ޑޮލަރަށް ވާ އަދަދަށް ބޭރު ފައިސާ ލިބޭ ވިޔަފާރިތަކުން އެ ފަރާތްތަކަށް ލިބޭ ބޭރު ފައިސާގެ އާމްދަނީ ރާއްޖޭގެ ބޭންކު އެކައުންޓަކަށް ޖަމާކުރުމެވެ. އެއީ ބޭރު ފައިސާގެ އާމްދަނީގެ 25 ޕަސެންޓަށް ވުރެ ބޮޑުނުވާ ގޮތަށް، ހަދާ ގަަވައިދެއްގެ ތެރެއިން މާރުކުރަން ޖެހޭ ގޮތަށެވެ.
މި ހާލަތުގެ ދަށުން އިސްތިސްނާވާ ފަރާތްތައް ވެސް ބިލުގައި ވަނީ ކަނޑައަޅާއިފަ އެވެ.
- 24 ގަޑިއިރު ހޭދަނުކުރާ ޓޫރިސްޓުން
- ދެ އަހަރުން ދަށުގެ ކުޑަކުދިން
- ހިލޭ ނުވަތަ ކޮމްޕިލެމްޓަރީކޮށް ތިބޭ ފަރާތްތައް
