މި އެއްބަސްވުމަށް އަމަލުކުރަން ފެށުމާ ގުޅޭގޮތުން މިއަދު ބޭއްވުނު އޮންލައިން ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ މި ފުރުސަތުގެ ބޭނުން ދިވެހި ވިޔަފާރިވެރިން ފުރިހަމައަށް ހިފާނެކަމަށް ޔަގީންކަން އޮތް ކަމަށެވެ.
މި އެއްބަސްވުމުގެ ދަށުން ޗައިނާއަށް އެކްސްޕޯޓުކުރާ 95 ޕަސަންޓު މުދަލުން ޑިއުޓީ ނުނަގާ ގޮތަށް ހަމަޖެހިގެންދާއިރު، ރާއްޖެއަށް އެތެރެކުރާ މުދަލުގެ 70 ޕަސަންޓުން ޑިއުޓީ މާފުވެގެންދާނެއެވެ. އަދި ކުރިއަށް އޮތް ފަސް އަހަރު ދުވަހުގެ ތެރޭގައި އިތުރު 20 ޕަސަންޓު މުދަލުން ޑިއުޓީ މާފުވެގެންދާނެ ކަމަށް މިނިސްޓަރު ސައީދު ވިދާޅުވިއެވެ.
ދިވެހި ވިޔަފާރިވެރިންގެ ހުނަރުވެރިކަމާއި ކުރިއެރުމުގެ މިސާލެއްގެ ގޮތުގައި ޓޫރިޒަމް ދާއިރާ ފާހަގަކުރައްވަމުން މިނިސްޓަރު ވިދާޅުވީ، 1972 ގައި ފެށުނު އާދައިގެ ޓޫރިޒަމް މިއަދު ދުނިޔޭގެ އެންމެ ލަގްޒަރީ އަދި ޕްރީމިއަމް މަންޒިލަކަށް ވެފައިވާ ކަމަށެވެ. އަދި މި އެއްބަސްވުމުގެ ސަބަބުން ޗައިނާގެ އިގްތިސާދީ ކުރިއެރުމުގެ އެންމެ ބޮޑު ފައިދާއެއް ލިބޭނީ ރާއްޖެއަށް ކަމަށް މިނިސްޓަރު ފާހަގަކުރެއްވިއެވެ.
- ޗައިނާއާއެކު ވެވުނު މިނިވަން ވިޔަފާރީގެ އެއްބަސްވުމަށް އަމަލުކުރަން ފަށަނީ މި މަހުގެ ތެރޭގައި
- ޗައިނާއަށް އެކްސްޕޯޓުކުރާ 95 ޕަސަންޓު މުދަލުން ޑިއުޓީ މާފުވާނެ
- ރާއްޖެއަށް އެތެރެކުރާ މުދަލުގެ 70 ޕަސަންޓުން ވަގުތުން ޑިއުޓީ މާފުވާނެ
- ފަސް އަހަރު ތެރޭގައި އިތުރު 20 ޕަސަންޓު މުދަލުން ޑިއުޓީ މާފުވެގެންދާނެ
- މި އެއްބަސްވުމަކީ ރާއްޖޭގެ ވިޔަފާރިއަށް ލިބުނު އެންމެ ބޮޑު ފުރުސަތުތަކުގެ ތެރެއިން އެއް ފުރުސަތު
