ބީއެމްއެލްއިން ތައާރަފްކުރި "ގްރީން ރިސޯޓް ފައިނޭންސިން" ސްކީމާ ތައާރަފް ކުރުމާއި ގުޅިގެން ވާހަކަދައްކަވަމުން އަފީފް ވިދާޅުވީ، ރާއްޖޭގެ ޓޫރިޒަމަށް މިހާރު ވަރަށް ބޮޑު ބަދަލެއް އައިސްފައިވާ ކަމަށާއި، ދެމެހެއްޓެނިވި ގޮތެއްގައި ކުރިއަށް ގެންދިޔުމަށް ތިމާވެއްޓާ ރައްޓެހި ގޮތްތައް އިހުތިޔާރުކުރަން ޖެހޭ ކަމަށެވެ.
މީރު މޯލްޑިވްސް ރިސޯޓު މިހާރު ހިންގަމުންދަނީ އިއާދަކުރަނިވި ހަކަތައިން ކަމަށާއި، އެ މަޝްރޫއު ކުރިއަށް ގެންދިޔައީ ބީއެމްއެލްގެ ލޯނު އެހީގައި ކަމަށް އަފީފް ފާހަގަކުރެއްވިއެވެ. މި މަޝްރޫއާ އެކު ރިސޯޓުގެ ކަރަންޓަށް ކުރާ ހޭދަ ވަރަށް ބޮޑަށް ކުޑަކުރެވިފައިވާ ކަމަށްވެސް އޭނާ ބުންޏެވެ.
ބީއެމްއެލްގެ ގްރީން ރިސޯޓް ފައިނޭންސިން ސްކީމްގެ ދަށުން 50 މިލިއަން ރުފިޔާއާ ހަމައަށް 6.5 ޕަސަންޓުގެ އިންޓްރެސްޓް ރޭޓުގައި ލޯނު ދޫކުރާނެއެވެ. މި ސްކީމްގެ ދަށުން ގޮނޑުދޮށް ހިމާޔަތްކުރުމާއި، އެނަރޖީ އެފިޝެންޓް އިކުއިޕްމަންޓް ހޯދުމާއި، ރީފޮރެސްޓްރޭޝަން އަދި ކުނި މެނޭޖްކުރުން ފަދަ ދެމެހެއްޓެނިވި މަޝްރޫއުތަކަށް ފައިނޭންސް ފޯރުކޮށްދެވޭނެއެވެ.
