
ތިމާވެއްޓާ ރައްޓެހި ޓެކްސީ ފްލީޓެއް މެދުވެރިކޮށް މި ހިދުމަތް ފެށުމަށް އެމްޓީސީސީއާ ހަވާލުކުރުމުގެ ރަސްމިއްޔާތުގައި ސައުދީ ވިދާޅުވީ މިހާރު މާލޭގައި ދިމާވެފައިވާ ޓެކްސީ ނުލިބުމުގެ މައްސަލައަށް ހައްލެއް ގެނައުމަށް މި ހިދުމަތުން މަގުފަހިވެގެންދާނެ ކަމަށެވެ. އަދި މި ހިދުމަތަކީ ރައްޔިތުންނަށް ޔަގީންކަމާއި އިތުބާރާއެކު ލިބޭނެ ހިދުމަތެއް ކަމަށްވެސް އޭނާ ވިދާޅުވިއެވެ.
އެމްޓީސީސީގެ އާ ޓެކްސީ ފްލީޓަކީ ހަނި މަގުތަކަށް ވަދެވޭ، ތިމާވެއްޓާ ރައްޓެހި އުޅަނދުތަކެއް ކަމަށް ސައުދީ ވިދާޅުވިއެވެ. މި ހިދުމަތް 24 ގަޑިއިރު ލިބެން ހުންނާނެ ކަމަށާއި، އެކަމަށްޓަކައި ފުލްޓައިމް އަދި ޕާޓްޓައިމް މުވައްޒަފުން ގެންގުޅޭނެ ކަމަށް އޭނާ ވިދާޅުވިއެވެ.
ވަޒީފާ ނެތް މީހުންނަށް އާމްދަނީ ހޯދުމުގެ ފުރުސަތު ފަހިވެގެންދާނެ މި ހިދުމަތުގައި، ޕާޓްޓައިމްކޮށް މަސައްކަތްކުރާ މީހުންނަށް ކޮންމެ ހަފުތާއަކު ނުވަތަ ދެ ހަފުތާއަކުން އެއްފަހަރު އުޖޫރަ ލިބޭނެ އިންތިޒާމު ހަމަޖެހިފައިވާ ކަމަށް ސައުދީ ވިދާޅުވިއެވެ. އަދި ޓެކްސީ ޑްރައިވަރުންގެ ގޮތުގައި މަސައްކަތްކުރާ މީހުންނަށް އެވެއަރނެސް ޕްރޮގްރާމްތައްވެސް ހިންގާނެ ކަމަށް އޭނާ ވިދާޅުވިއެވެ.