ފޮރިން މިނިސްޓަރު އަބްދުﷲ ކަލީލް ސްރީ ލަންކާގެ ފޮރިން މިނިސްޓަރު ވިޖީތާ ހެރަތުއާ ބައްދަލުކުރެއްވި ބައްދަލުވުމުގައި، ދެ ގައުމުގެ ވިޔަފާރިވެރިންނަށް އިންވެސްޓްމަންޓް ފުރުސަތުތައް ފަހިކޮށްދިނުމަށް އެއްބަސްވުންތަކެއް ގާއިމްކުރުމާ ގުޅޭގޮތުން މަޝްވަރާކުރެވުނެވެ. މި މަޝްވަރާތަކުގައި ޓޫރިޒަމް، މަސްވެރިކަން، އިއާދަކުރަނިވި ހަކަތަ އަދި ދަތުރުފަތުރުގެ ދާއިރާތަކަށް އިސްކަން ދެވުނެވެ.
ފޮރިން މިނިސްޓްރީން ބުނީ ދެ ގައުމުގެ ގުޅުން އިތުރަށް ބަދަހިކޮށް، އެކި ދާއިރާތަކުން ގުޅިގެން ކުރެވިދާނެ މަސައްކަތްތަކާ ގުޅޭގޮތުން ވަރަށް ފުޅާ ދާއިރާއެއްގައި މަޝްވަރާކުރެވުނު ކަމަށެވެ. އަދި ބައިނަލްއަގުވާމީ އަދި ސަރަހައްދީ ފެންވަރުގައި ދެ ގައުމުގެ މަސްލަހަތު ހިމެނޭ ކަންކަމުގައި ގުޅިގެން މަސައްކަތްކުރުމަށްވެސް އެއްބަސްވެވުނެވެ.
ފޮރިން މިނިސްޓަރުގެ މި ދަތުރުފުޅުގައި ސްރީ ލަންކާގެ ރައީސް އަނުރަ ކުމާރަ ދިސާނަޔަކަ އަދި ބޮޑުވަޒީރު ޑރ. ހަރީނީ އަމަރަސޫރިޔެއާވެސް ބައްދަލުކުރައްވާނެއެވެ. އަދި ލަންކާގައި ދިރިއުޅޭ ދިވެހިންނާއި އަމިއްލަ ފަރާތްތަކާއެކު ބައްދަލުވުންތައް ބާއްވާ، އިތުރު މަޝްވަރާތައް ކުރިއަށް ގެންދެވޭނެއެވެ.
