ads
އިސްރާއީލުގެ ހަމަލާތަކުގައި ސުންނާފަތުކޮށްލައިފައިވާ މިސްކިތްތައް ހުރި ސަރަހައްދުގައި ރަމަޟާން މަހުގެ ފުރަތަމަ ދުވަހު ގާޒާގެ އާްންމުންގެ ބަޔަކު ނަމާދު ކުރަނީ -- ފޮޓޯ/އަލްޖަޒީރާ
ރަމަޟާން މަހުގެ މާތްކަމާއި މަތިވެރިކަން
ބަރަކާތުން ފުރިގެންވާ ހެޔޮކަމުގެ ދުވަސްތަކަށް ފެށުނީ އެވެ. މިއަދަކީ މިއަަހަރުގެ ރަމަޟާން މަހުގެ ފުރަތަމަ ދުވަހެވެ. ފަހެ، ރަމަޟާން މަހަކީ މަތިވެރިވެގެންވާ މަހެކެވެ. ބަރަކާތްތެރި މަހެކެވެ. އެއީ ރޯދަހިފުމާއި ރޭއަޅުކަމުގައި ގާއިމްވުމާއި ސުންނަތް ނަމާދުތައް ބަރާބަރަށް އަދާކުރުމާއި ގުރުއާން ތިލާވަތު ކުރުމުގެ މަހެވެ. އެއީ ފާފަ ފުއްސެވުން ލިބޭ، ނަރަކައިން މިންޖުކުރެވޭ މަހެވެ. މީހުންނަށް އިހުސާންތެރިވުމާއި ސޮދަގާތް ދިނުމުގެ މަހެވެ. އެއީ އެމަހެއްގައި ސުވަރުގޭގެ ދޮރުކޮޅުތައް ހުޅުވިގެންދާ މަހެވެ. ހެޔޮކަންކަމުގެ ސަވާބާއި ދަރުމަ އެތަކެއް ގުނަޔަކަށް އުފުލިގެންދާ މަހެވެ. އެމަހެއްގައި ދުއާތައް އިޖާބަވާ މަހެވެ. ރޯދަވެރިޔާގެ ދަރަޖަތައް އުފުލިގެންދާ މަހެވެ. ނުބައި ފާފަތައް ފުހެވިގެންދާ މަހެވެ. މާތް ﷲ ގެ ދީލަތިވަންތަކަން އިތުރުކޮށްދެއްވާ މަހެވެ.
Advertisement

އިސްލާމްދީން ބިނާވާ ފަސް ރުކުނުގެ ތެރެއިން އެއް ރުކުނަކީ ރަމަޟާން މަހުގައި، އެމަހުގެ ފުރަތަމަ ދުވަހުން ފެށިގެން އެންމެފަހު ދުވަހާއި ހަމައަށް ކޮންމެ ދުވަހަކު ރޯދައަށް ހުރުމެވެ. އޭގެ މާނައަކީ ރޯދަ ގެއްލޭނެ ކަމަށް އިސްލާމްދީނުގައި ކަނޑައަޅުއްވާފައިވާ އެންމެހައި ކަމަކުން އެއިން ކޮންމެ ދުވަހެއްގައިވެސް ފަޖުރުގެ އަލިކަން ފާޅުވީއްސުރެ އިރުއޮއްސިއްޖައުމަށް ދާންދެން ދުރުހެލިވެ އެކަންކަން ކުރުމުން ރައްކާތެރިވެގެން ހުރުމެވެ.  

ރަމަޟާން މަހުގެ އަޅުކަމުން ނަފްސު ތަޒުކިޔާކުރަން ފުރުސަތު ލިބެނީ އެހެން އަޅުކަންތަކެކޭ އެއްފަދައިން ރަމަޟާން މަހުގެ އަޅުކަމުގެ ވެސް އެންމެ މަތީ އަމާޒަކީ ތަގުވާވެރިކަން ހާސިލުކުރުން ކަމަށް ވާތީ އެވެ. ނަފްސު ތަޒުކިޔާ ކުރުމަކީ ތަގުވާވެރިކަމުގެ ނަތީޖާ އެވެ. 

ރަމަޟާން މަހުން ތަގުވާވެރިކަން ހާސިލުކުރާ ގޮތަކީ އެންމެ ފުރަތަމަ އަމިއްލަ ނަފްސުގެ އެދުންތަކާއި ބޭނުންތަކަށް ވުރެ މާތް ﷲ ގެ ރުހިވޮޑިގަތުން އިސްކޮށްގެންނެވެ. ތިމާ ދުނިޔޭގައި ދެމިހުރުމުގެ ސަބަބު ކަމުގައިވާ ކެއުންބުއިން ވަކި ވަގުތެއްގައި ދޫކޮށްލައި ގުރުބާނެއް ވާން ޖެހެ އެވެ. އިންސާނީ ނަސްލު ދުނިޔޭގައި ދެމިއޮތުމުގެ ސަބަބު ކަމުގައިވާ ޖިންސީ އެދުންވެރިކަމުން ވެސް ވަކިވަގުތެއްގައި މަހްރޫމްވެ، ގުރުބާނެއް ވާން ޖެހެ އެވެ.

ރަމަޟާން މަހަކީ އެމަހެއްގައި ރޯދަހިފައިފި ނަމަ އޭގެ ކުރިން ކުރެވިފައިވާ އެންމެހައި ކުދިފާފަތަކެއް ފުހެވިގެންދާ މަހެވެ. އަދި އެމަހެއްގައި ރޭއަޅުކަން ކޮށްފިނަމަ ވެސް އެއަޅުކަންތަކުގެ ސަވާބުގެ އިތުރުން ކުރިން ކުރެވިފައިވާ އެންމެހައި ކުދިފާފަތަކެއް ފުހެވިގެންދާ މަހެވެ. 

ރަމަޟާން މަހުގެ ހާއްސަކަމާއި މަތިވެރިކަމަށް ބަލާއިރު، ގުރުއާން ބާވައިލެއްވުނީ އެ މަހުގަ އެވެ. މާތް ﷲ ބާވައިލެއްވި އެހެނިހެން ފޮތްތައް ބާވައިލެއްވީވެސް އެ މަހުގަ އެވެ. ސުވަރުގޭގެ ދޮރުކޮޅުތައް އެ މަހުގައި ހުޅުއްވަވައި ނަރަކައިގެ ދޮރުތައް ބަންދު ކުރެވޭނެ އެވެ. އަދި ޝައިތާނުން ކަސްތޮޅު އެޅުއްވޭނެ އެވެ. އެ މަހުގައި ކުރާ އުމުރާގެ އަޖުރު ހައްޖަކާ އެއްވަރުވެގެން ވެއެވެ. އެ މަހުގައި އެއްހާސް މައްސަރަށް ވުރެ ހެޔޮކަން ބޮޑުވެގެންވާ ރެއެއް ވެއެވެ.

ރަމަޟާން މަހަކީ ހެޔޮ އަމަލުތައް ކުރާމީހުންނަށް މިލިއަނުން ބިލިޔަނުން ސަވާބުތައް އޮއްސަވާދެއްވާ މަހެކެވެ. ކީރިތި ރަސޫލާ صلى الله عليه وسلم ބަޔާންކޮށްދެއްވައިފައިވާ ފަދައިން އެއީ މާތް ﷲ އެ މަހުގައި މުއުމިނުން ފުދުންތެރިކުރައްވާނެ މަހެކެވެ. ރަޙްމަތް ބާވައިލައްވާނެ މަހެކެވެ. އެއީ ކުށްފާފަތައް ފުއްސަވާދެއްވާނެ މަހެކެވެ. އެއީ ދުއާ އިޖާބަކުރައްވާނެ މަހެކެވެ. އެ މަހުގައި މާތް ﷲ މުސްލިމުން ހެޔޮ އަމަލުތަކުގައި ވާދަކުރާގޮތަށް ބައްލަވައި މަލާއިކަތުންގެ މަޖިލިސްތަކުގައި ފަހުރުވެރިވެވޮޑިގަންނަވާނެތެވެ. މިހެންވެ ކީރިތި ރަސޫލާ صلى الله عليه وسلم އަންގަވަނީ އަޅުގަނޑުމެންގެ ކިބައިން މާތް ﷲ އަށް ހެޔޮ އަމަލުތައް ދެއްކުމަށެވެ. އެ މަހުގައި ކުރާ ސުންނަތް ކަންތައްތައް އެހެން މަސްމަހުގައި ކުރާ ފަރުޟު ކަންތައްތަކާ ސަވާބު ދެއްވުމުގައި އެއްވަރެވެ.

މި މައްސަރަކީ އަޅުގަނޑުމެންގެ އަމަލުތައް އިސްލާހުކޮށް، އާހިރަތުގެ ބާއްޖަވެރިކަން ހާސިލުކުރުމަށް ދެއްވާފައިވާ ވަރަށް ތަނަވަސް ފުރުސަތެކެވެ. އެހެންކަމުން މި ފެށުނު ރަމަޟާން މަހުގައި އަޅުގަނޑުމެންގެ އަޒުމަކަށް ހަދަންވީ، މި ބަރަކާތްތެރި މައްސަރުގެ ރޭތަކާއި ދުވަސްތަކުގައި މާތް ﷲ ލައްވާފައިވާ މަތިވެރި ރޫޙާނީ ފައިދާތަކުގެ ނަސީބުވެރިން ކަމުގައި ވުމަށް އަވަސްވެ ގަތުމަށެވެ. އެކަމަށް ގަދައަޅާ ބުރަ މަސައްކަތް ކުރުމަށެވެ.

ރޯދައިގެ މަތިވެރި ސަވާބާއި ދަރުމަ ހޯދުމަށްޓަކައި ކުރަންވީ ކަންކަމުގެ ތެރޭގައި:

  • ހާރު ކެއުން ފަސްކުޅަން
  • ފަރުޟު ނަމާދުތަކަށާއި، ރަވާތިބު ސުންނަތްތަކަށް ރައްކައުތެރިން
  • ކީރީތި ގުރްއާން ކިޔަވާ އިރު، ގުރްއާނާ މެދު، ވިސްނައި ފިކުރުކުރުން
  • ގިނަގިނައިން ދުއާކުރުން 
  • އަނބިދަރީންނާއި މައިންބަފައިންނާއި ގާތްތިމާގެމީހުންނަށް ހެއު ފޯރުވައި އިހުސާންތެރިވެ އުޅުން
  • ވަގުތުވުމުން ރޯދަވީއްލުން އަވަސްކުރުން
  • ގިނަގިނައިން ސޮދަގާތްކުރުން 
  • ތަރާވީހު ނަމާދާއި ރޭއަޅުކަންކުރުން

މާތް ﷲ ރަމަޟާންމަހުގައި ލައްވައިފައިވާ ނަފްހާތުތަކަކީ އެ މަހުގެ ދީލަތިކަން ފާޅުވެގެންދާ ކަމެކެވެ. މަހުގެ ފުރަތަމަ ދިހައިގައި އޮތީ ﷲގެ ރަހުމަތެވެ. ދެވަނަ ދިހައިގައި އޮތީ ﷲގެ މައުފިރަތެވެ. ފުއްސެވުމެވެ. ތިންވަނަ ދިހައިގައި އޮތީ ނަރަކައިން މުއްތިކުރެއްވުމެވެ. ނަރަކައިން މުއްތި ކުރެވުނު މީހާއަށް މުޅި އާހިރަތް ބާއްޖަވެރިކަމާއެކު ލިބުނީ އެވެ.

ރަމަޟާންމަހާ ބައްދަލުވެ، އެ މަހު އޭނާގެ ނަފުސު ތަހުޒީބުނުވެ، ހަމައެކަނި ނަމަކަށް ރޯދަހިފައިފި ނަމަ، އެ މަސް އެއްކޮށް ބޭކާރު ކޮށްލެވުނީ އެވެ. އަޅަމެންނަށް މިރޯދައިގެ އެންމެފުރިހަމަ ފައިދާއާއި ސަވާބާއި ދަރުމަދެއްވާންދޭވެ! ރޯދައިގެ ސަވާބަށް އުނިކަން އަންނާނޭ ކަންކަން އަޅަމެން ދުރުކޮށް މިއަޅުކަމަކީ އިބަ ﷲ ގެ ހަޒްރަތުގައި ގަބޫލުވެވިގެންވާ އަމަލެއް ކަމުގައި ލައްވާންދޭވެ! 

އާމީން!

0%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް