މިފްކޯއިން ބުނީ މިދިޔަ ހަފްތާގައި ޖުމްލަ 232 މަސްދޯންޏަކުން މަސް ކިރުވާފައިވާ ކަމަށެވެ.
މަސްވެރިންނަށް ފައިސާ ދޫކުރުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދާ އެއްގޮތަށް، މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ދޫކުރެވެމުންދާކަން މިފްކޯއިން ހާމަކުރިއެވެ. މަހުގެ 8 ވަނަ ދުވަހަކީ މިދިޔަ ހަފްތާގައި އެންމެ ގިނަ ފައިސާ ދޫކުރެވުނު ދުވަސްކަމަށްވާއިރު، އެދުވަހު 40 މަސްދޯންޏަކަށް 7.5 މިލިޔަން ރުފިޔާ ދޫކުރެވިފައިވެއެވެ.
މިފްކޯއިން އިތުރަށް ފާހަގަކުރި ގޮތުގައި، މިއަހަރުގެ ފެބްރުއަރީ މަހު މަސްވެރިން ކިރުވި މަހަށް 120 މިލިޔަން ރުފިޔާ ދޫކޮށްފައިވެއެވެ. މިއީ ހުސްވި ޖެނުވަރީ މަހާ އަޅާބަލާއިރު 2.6 ޕަސަންޓު އިތުރު އަދަދެކެވެ. ޖަނަވަރީ މަހު މަސްވެރިންނަށް 177 މިލިޔަން ރުފިޔާ ދޫކުރެވިފައިވާކަން ފާހަގަކުރެވެއެވެ.
ފަހުގެ ތާރީހެއްގައި މިފްކޯއަށް އެންމެ ގިނަ މަސް ކިރުވާފައިވަނީ މިއަހަރުގެ ފެބްރުއަރީ 12 ވަނަ ދުވަހުއެވެ. އެދުވަހު 546 ޓަނުގެ މަސް 48 މަސްދޯންޏަކުން ކިރުވާފައިވާއިރު، އެދޯނިތަކަށް 7.6 މިލިޔަން ރުފިޔާ ދޫކުރެވިފައިވެއެވެ.
ސަރުކާރުން މަސްވެރިކަމުގެ ސިނާއަތް އިތުރަށް ތަރައްގީކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ އެއް ސިނާއަތަށް ހެދުމަކީ އަމާޒެއްކަމަށް ބުނެއެވެ. މިކަމަށްޓަކައި މަސްވެރިކަމުގެ ސިނާއަތަށް ދިމާވެފައިވާ މައްސަލަތަކުގެ ހައްލު ސަރުކާރުގެ ފުރަތަމަ 3 އަހަރުގެ ތެރޭގައި ގެނެސްދިނުމަށް، މަސްވެރިކަމުގެ ފެސިލިޓީތައް ތަރައްގީކުރުމުގެ މަސައްކަތްވެސް ކުރިއަށްދާކަމަށް ފާހަގަކުރެވެއެވެ.
