18 މީހުންނާއި އެކު ތ. ހިރިލަންދޫއިން މާލެއަށް ދަތުރުކުރަމުން ދިޔަ "ހޮޅުދޫ ބޯޓު"ގައި އެރޭގެ އިރާކޮޅު ރޯވީ ތ. ކަނޑޫދޫ ކައިރިން ދަތުރުކުރަމުން ދަނިކޮށެވެ.
މި ހާސިދާގައި މާވަށް ނިސްބަތްވާ އުމުރުން 25 އަހަރުގެ އަލީ މުޝްފިގް ފިޔަވާ އެންމެން ވަނީ ސަލާމަތްކުރެވިފައެވެ. މުޝްފިގު ގެއްލި އެ ޒުވާނާ ހޯދުމުގެ މަސައްކަތް އަންނަނީ ކުރަމުންނެވެ.
ބޯޓުގައި ރޯވި އަލިފާންގަނޑު ކޮންްތްރޯލް ނުވެ މުޅި ބޯޓް އެއްކޮށް އަނދާ ހުލިވެ މާސިންގާ ކަނޑަަށް ވަނީ އަޑިއަށް ގޮސްފައެވެ.
ހޮޅުދޫ ބޯޓުގައި އަލިފާން ހިފައިގެން ސިފައިން އާންމުކުރި ވޯޑިއޯގެ މަންޒަރެއް
މި ބޯޓަކީ ނ ހޮޅުދޫ ބޯޓެއް ނަމަވެސް ބޯޓު ދުއްވަމުން އަންނަނީ ލާ. މާވަށު މީހަކު ކުއްޔަށް ނަގައިގެންނެވެ. އޭނާ މި ބޯޓް ބޭނުންކުރަނީ ލ. އަދި ތ. އަތޮޅުގެ ރަށްރަށާއި މާލެއާ ދެމެދު މުދާ ހިފައިގެން ދަތުރުކުރުމަށެވެ.
ބޯޓުގައި ރޯވި ގޮތުގެ ވާހަކަ ދައްކަމުން އެބޯޓްގެ ވެރިފަރާތުން ބުނީ ބޯޓްގައި ރޯވީ ކަރަންޓް ޝޯޓެއް ވެގެންކަމަށް ބެލެވޭކަމަށެވެ. އަދި އަލިފާން ރޯވީ ބޯޓުގައި ބޭނުންކުރާ ސްޓޭންޑުބައި ޖެނެރޭޓަރުގައިކަމަށްވެސް އޭނާ ބުންޏެވެ. އަލިފާން ރޯވެ ބޯޓު އަނދައިގެން ދިޔުމުން ލިބުނު ގެއްލުން ގާތްޑަކަށް 5 މިލިއަނަށް އަރާނެކަމަށް ބޯޓުގެ ވެރި ފަރާތުން ބުނެއެވެ.
މުދާ ހިފައިގެން ދަތުރުކުރާ މި ބޯޓުގައި އަލިފާން ރޯވިއިރު މާ ގިނަ މުދާތަކެއް ނެތްކަމަށްވެއެވެ. އެހެންނަމަވެސް ބޯޓުގައި ސައިކަލެއްތަކެއް ހުރިކަމަށާއި އަލިފާނުގެ ހާދިސާގެ ސަބަބުން ބޯޓްގެ ކޭޝިއަރުގެ ނަފްސާނީ ހާލަތު ރަނގަޅު ނޫންކަމުން އެއީ ކިތައް ސައިކަލެއް ކަމެއް އަދި ސާފު ނުވާކަމަށްވެސް ބޯޓުގެ ވެރި ފަރާތުން ވަނީ ބުނެފައެވެ.
'ހޮޅުދޫ ބޯޓުން" ގެއްލުނު ޒުވާނާ ހޯދުމަށް މަސައްކަތް އަދިވެސް އެމްއެންޑީއެފުން އަންނަނީ ކުރަމުންނެވެ. އެގޮތުން ކަނޑުގެ އަޑީގެ ބޮޑު ސަރަހައްދެއް ޑައިވަރުން ބަލާފައިވާކަމަށް އެމްއެންޑީއެފުން ބުނެއެވެ.
