މަޓާޓޯ އާއި އެންބީއޭއެމް އިން ނެރުނު ބަޔާނެއް ގައި ބުނެފައި ވަނީ، އެ ދެ އެސޯސިއޭޝަން އިން ކޯކާ ކޯލާ އާއި ގުޅިގެން ދިވެހިން އަދި ބިދޭސީން ހިމެނޭ ގޮތަށް 500 މީހުންނަށް ކާނާ ފޯރުކޮށްދޭން ނިންމާފައި ވާކަމަށެވެ. މިއީ ކޮވިޑް-19 ގެ ސަބަބުން ރައްޔިތުނަށް ދިމާވެފައިވާ ގޮންޖެހުންތަކުގެ ސަބަބުން ކާނާ ނުލިބި ތިބި ފަރާތްތަކަށް އެހީ ފޯރުކޮށްދިނުމުގެ ގޮތުން ކުރަން ނިންމި ކަމެކެވެ.
ރަމަޟާން މަހާއި ކުރިމަތިލާއިރު އެތައް ބަޔަކު ބޯހިޔާވަހިކަމާއި ކާބޯތަކެތި ނެތިފައި އެބަތިބި ކަމަށާއި މިކަމުގެ ސަބަބުން ގިނަ ބަޔަކު ބަލިވުމުގެ ފުރުސަތު އެބައޮތްކަމަށް ބަޔާނުގައި ވަނީ ފާހަގަ ކޮށްފަ އެވެ.
އެގޮތުން، ކުރިއަތް އޮތް 30 ދުވަހަށް ކާނާ ފޯރުކޮށްދިނުމަށް ހަމަޖެހިފައި އޮތީ މިވަގުތު ސަރުކާރުން މާލެ އާއި ހުޅުމާލޭގައި ބޯހިޔާވަހިކަން ފޯރުކޮށްދެމުންދާ ދިވެހިންނަށާއި ބިދޭސީންނަށް ކަމަށް ބަޔާނުގައިވެ އެވެ.
މީގެ އިތުރުން، މާލޭގައި ކާބޯތަކެތި ތައްޔާރުކުރުމަށް ސަލްސާ ކޭޓަރިންގެ އެހީތެރިކަމާއެކު ބަދިގެއެއް ލިބިފައިވާ ކަމަށާއި އަދި ހުޅުމާލޭގައި ކާބޯތަކެތި ތައްޔާރުކުރުމަށް ބަދިގެއެއް ހޯދުމުގެ މަސައްކަތް ކުރިއަށްދާ ކަމަށް ބަޔާނުގައިވެ އެވެ. އަދި ތައްޔާރުކުރާ ކާބޯތަކެތި ވަގުތީ ހިޔާތަކުގައި އުޅޭ މީހުންނަށް ބެހުމަށް ހަމަޖެހިފައިވަނީ ކަމާބެހޭ އިދާރާތަކުގެ އެއްބާރުލުމާއެކުގައި ކަމަށާއި އެކަމުގައި ބައިވެރިވެ އެއްބާރުލުން ދޭން ބޭނުންވާ ފަރާތްތަކަށް އެ ފުރުސަތުވެސް ހުޅުވާލެވިފައިވާ ކަމަށް ބަޔާނުގައިވެ އެވެ.
މަޓާޓޯ އާއި އެންބީއޭއެމް އިން ދަނީ ކޮވިޑް-19 ގެ ސަބަބުން ދިމާވާ ގޮންޖެހުންތަކުން އަރައިގަތުމަށް އެހީތެރިވެދިނުމަށް ސަރުކާރާއެކު ގިނަ މަޝްވަރާތަކެއް ކުރަމުންނެވެ.