މި ކެމްޕޭން ކުރިއަށްގެންދާނީ މުހިންމު އަރަބިއަން ޓްރެވަލް މާކެޓް 2025 (އޭޓީއެމް) އާ ދިމާކޮށެވެ. 2025 ވަނަ އަހަރުގެ އޭޕްރިލް އަދި މެއި މަހުގެ ތެރޭގައި ޑުބާއީގެ ގްރީން ޓެކްސީތައް ރާއްޖޭގެ ހިތްގައިމު މަންޒަރުތަކާއި ލިވަޕޫލް ފުޓްބޯލް ކްލަބްގެ މަޝްހޫރު ކުޅުންތެރިންގެ ފޮޓޯތަކާއެކު ރެޕްކޮށްފައި ފެންނަން ހުންނާނެއެވެ.
މި ކެމްޕޭންގެ މައިގަނޑު މަގުސަދަކީ ދަތުރުފަތުރަށް ޝައުގުވެރިވާ ފަރާތްތަކާއި ފުޓްބޯޅައަށް ލޯބިކުރާ ފަރާތްތަކުގެ ސަމާލުކަން ހޯދައި، ރާއްޖެއަކީ ޕްރިމިއާ ލަގްޒަރީ މަންޒިލެއްގެ ގޮތުގައި މެދުއިރުމަތީގެ މާކެޓްގައި ޕްރޮމޯޓްކުރުމެވެ. މި ރެޕްތަކުގައި އަރަބި ބަހުން މެސެޖްތައް ހިމަނާފައިވަނީ މެދުއިރުމަތީގެ މާކެޓްގެ ޓޫރިސްޓުންނަށް އަމާޒުކޮށްގެން، އެބޭފުޅުންގެ އަމިއްލަ ބަހުން މާކެޓުކޮށް، އެ މީހުންގެ ހިތްތަކަށް ރާއްޖެ އާ މެދު ގާތް ގުޅުމެއް އުފެއްދުމަށެވެ.
ޓެކްސީ ކެމްޕޭންގެ އިތުރުން، އޭޓީއެމް 2025 ގައި ރާއްޖޭގެ ސްޓޭންޑުގައި ހާއްސަ ލިވަޕޫލް އެފްސީ ތީމްގެ ޒޯނެއް ގާއިމްކުރުމަށްވެސް ވަނީ ހަމަޖެހިފައެވެ. މި ޒޯނުގައި ރާއްޖޭގެ ހިތްގައިމު ފޮޓޯ ބެކްޑްރޮޕްއެއް ހުންނާނެއެވެ. ސްޓޭންޑަށް ޒިޔާރަތްކުރާ ފަރާތްތަކަށް އެ ފަރާތްތަކަށް އެންމެ ކަމުދާ ލިވަޕޫލް އެފްސީ ކުޅުންތެރިންގެ ކަޓްއައުޓްތަކާއެކު ފޮޓޯނެގުމުގެ ފުރުސަތު ލިބޭނެއެވެ.
