ޒަކިއްޔާ އޮޓަޕްސީ އެންމެ ފުރަތަމަވެސް ނެހޭދީ ކީއްވެތޯ އާއްމު ރައްޔިތަކު އަހާ ފޯރަމްގައި ކުރި ސުވާލަކަށް ޖަވާބު ދެއްވަމުން މިނިސްޓަރު އިހްސާން ވަނީ ޒަކިއްޔާގެ އޮޓަޕްސީ ނެހެދި ސަބަބު ވަރަށް ތަފްސީލުކޮށް ކިޔާދެއްވާފައެވެ.
މިނިސްޓަރު އިހްސާން ވިދާޅުވީ ޒަކިއްޔާ މަރުވެފައި އޮއްވާ ފެނުނުމުން ފުލުހުންގެ ހާއްސަ ތަހުގީގު ޓީމެއް އެރަށަށް ގޮސް އޭނާގެ އޮޓަަޕްސީ ހަދަން މާލެ ގެނައިކަމަށެވެ. އެހެންނަމަވެސް އެތައް ހާސް އޮޓަޕްސީއެއް ހަދާފައިވާ ޑޮކްޓަރެއް އެދުވަސްވަރު މާލޭގައި ހުރުމުން ފުލުހުން އެކަމުގައި އޭނާގެ ލަފާ ހޯދިކަމަށެވެ.
ޒަކިއްޔާގެ މަރުގެ މައްސަލާގައި ނެގިފައިވާ ފޮޓޯތަކާއި މައުލޫމާތައް ފޮނުވާ އެފްބީއައި އާއި އިނގިރޭސިވިލާތުގެ ފުލުހުންނާއި އަދި އިންޑިއާގެ ކަމާއި ބެހޭ ފަރާތްތަކުގެ ހިޔާލު ހޯދާފައިވާކަމަށް މިނިސްޓަރު އިހްސާން ވިދާޅުވިއެވެ.
ޒަކިއްޔާ މަރާއި ގުޅިގެން ރައްޔިތުންގެ ކަންބޮޑުވުން އޮތުމުން މި ފަދަ މައްސަލަތަކުގައި އޮޓަޕްސީ ހަދަން މިހާތު ނިންމާފައިވާކަމަށް މިނިސްޓަރު އިހްސާން ވިދާޅުވިއެވެ.
ޒަކިއްޔާ މޫސާގެ ހަށިގަނޑުގެ ވާޗުއަލް އޮޓޮޕްސީ ފުލުހުން ވަނީ ހަދާފައެވެ. އެހެންނަމަވެސް އެ ރިޕޯޓް ބަލައިނުގަންނަ ކަމަށް އާއިލާއިން ވަނީ ބުނެފައެވެ.
