ނަސަންދުރާގައި ބޭއްވުނު އެމްޓީސީސީގެ އަހަރީ އާއްމު ޖަލްސާގައި ސައުދީ ވިދާޅުވީ މި ޕްރޮޖެކްޓަކީ ޓްރާންސްޕޯޓު މިނިސްޓްރީއާއި އެމްޓީސީސީއާ ދެމެދު ވެފައިވާ އެއްބަސްވުމެއްގެ ދަށުން ކުރިއަށްގެންދާ ޕްރޮޖެކްޓެއް ކަމަށެވެ.
ޓެކްސީ ލައިން ޕްރޮޖެކްޓްގެ ސަބަބުން އެމްޓީސީސީއަށް ގެއްލުމެއް ނުވާނެ ކަމަށާއި އަދި ކުންފުންޏަށް ފައިދާވެސް ވާނެ ކަމަށް ސައުދީ ވިދާޅުވިއެވެ. މި ޕްރޮޖެކްޓަށް އެމްޓީސީސީން ހަވާލުވެފައިވަނީ ތަފްސީލީ ފީސިބިލިޓީ ދިރާސާއެއް ހެދުމަށްފަހު ކަމަށްވެސް އޭނާ ވިދާޅުވިއެވެ. އަދި ޓެކްސީ ލައިނަށް ބޭނުންވާ އިލެކްޓްރިކް ވެހިކަލްތައް އުފައްދާނެ ކުންފުންޏެއް ހޯދުމުގެ މަސައްކަތާއި، އެ ކުންފުންޏަށް އެޑްވާންސް ފައިސާ ދޫކުރުމުގެ މަސައްކަތް މިހާރު ކުރިއަށްދާ ކަމަށް އޭނާ ވިދާޅުވިއެވެ.
އިލެކްޓްރިކް ވެހިކަލްތަކުގެ ޑިސްޓްރިބިއުޓާޝިޕް އެމްޓީސީސީއަށް ލިބިފައިވާ ކަމަށާއި، މިއީ ކުންފުނީގެ ވިޔަފާރި ފުޅާކުރުމަށް ލިބޭ ފުރުސަތެއް ކަމަށް ސައުދީ ފާހަގަކުރެއްވިއެވެ.
ސަރުކާރުން ބުނެފައިވާ ގޮތުގައި ޓެކްސީ ލައިންގެ ހިދުމަތް ފެށޭނެ ކަމަށް ލަފާކުރެވެނީ އޮގަސްޓް މަހުގެ ފަހުކޮޅުއެވެ.
