އެފްއެސްއެމްގެ ބާޖުތަކުން ވަގަށް ތެޔޮ ވިއްކާ މައްސަލަ ބޮޑުވެފައިވާކަން ރައްޔިތުންގެ މަޖިލީހުގެ މާލިއްޔަތު ކޮމިޓީއިން މިއަދު ވަނީ ފާހަގަކޮށްފައެވެ. އަދި އެކަމާ ގުޅިގެން އެފްއެސްއެމްގެ ވެރިން ކޮމިޓީއަށް ހާޒިރުކޮށް މިއަދު ވަނީ ސުވާލުވެސް ކޮށްފައެވެ.
ކޮމެޓިގެ ސުވާލުތަކަށް ޖަވާބު ދެއްވަމުން އެފްއެސްއެމްގެ މެނޭޖިން ޑިރެކްޓަރު ފާތިމަތު އާޝާން ވިދާޅުވީ ބާޖުތަކުން ވަގަށް ތެޔޮ ވިއްކާ މައްސަލަ ވަރަށް ބޮޑަށް ފެންމަތިވެފައިވާ ކަމަށާއި ބައެއް އުޅަނދުތަކުގައި އެކަން ވަރަށް ބޮޑުކަމަށެވެ. އެހެންކަމުން އެ ފަދަ މައްސަލައެއް ބަލާ ވަރަށް ފަހުން ދެ ބާޖެއްގެ ހުރިހާ ފަޅުވެރިން ވަޒީފާއިން ވަކިކޮށްފައިވާ ކަމަށް އާޝާން ވިދާޅުވިއެވެ.
މަޖިލީހުގެ ކޮމެޓީގައި އެފްއެސްއެމްގެ މެނޭޖިން ޑިރެކްޓަރު ފާތިމަތު އާޝާން
މަޖިލީހުގެ ކޮމެޓީގައި ވާހަކަ ދައްކަވަމުން އާޝާން ވިދާޅުވީ ތެރޮ ވަގަށް ވިއްކުން ހައްލުކުރަން ބާޖުތަކުގައި ސީސީޓީވީ ހަރުކުރަން ނިންމައި، ޕައިލެޓް ޕްރޮޖެކްޓެއްގެ ގޮތުގައި އެކަން ކޮށްފައިވާ ކަމަށެވެ. އަދި ވަރަށް އަވަހަށް ހުރިހާ ބާޖެއްގައިވެސް ކެމެރާ ހަރުކުރާނެ ކަމަށް އާޝާން ވިދާޅުވިއެވެ.
މީގެއިތުރުން ވަގަށް ތެޔޮ ވިއްކުން ހައްލުވޭތޯ އުޅަނދުތަކުގައި މަސައްކަތް ކުރާ މުވައްޒަފުންވެސް ކޮންމެ ތިން މަހަކުން ބަދަލުކުރަން ވަނީ ނިންމާފައިވާކަންވެސް އާޝާން ފާހަގަކުރެއްވިއެވެ.
