ދިގު މުއްދަތަކަށް ކާބޯތަކެތީގެ ރައްކާތެރިކަން ކަށަވަރުކުރުމަށް ޒަމާނީ ދަނޑުވެރިކަމަކީ ވަރަށް މުހިންމު ބިންގަލެއް ކަމަށް އެގްރިކަލްޗަ އެންޑް އެނިމަލް ވެލްފެއަ މިނިސްޓަރު ޑރ. މަރިޔަމް މާރިޔާ ވިދާޅުވެއްޖެއެވެ.
Advertisement
ކ. ކާށިދޫގައި ކުރިއަށް ގެންދިޔަ ޒަމާނީ ދަނޑުވެރިކަމުގެ ތަމްރީން ޕްރޮގްރާމް ނިންމުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ، ރާއްޖެއަށް ކުރިމަތިވެފައިވާ ބިމުގެ ދަތިކަމާއި މޫސުމީ ބަދަލުތަކުގެ ސަބަބުން ދިމާވާ ގޮންޖެހުންތަކުން އަރައިގަތުމަށް، ޒަމާނީ ޓެކްނޮލޮޖީ ހަލުވިކަމާ އެކު ބޭނުންކުރަން ޖެހޭ ކަމަށެވެ.
މިނިސްޓަރު ވިދާޅުވީ ވެލިނުލައި ކުރާ ދަނޑުވެރިކަމާއި ނިއުޓްރިއަންޓް މެނޭޖްމަންޓް ފަދަ ދާއިރާތަކުން ލިބޭ ހުނަރަކީ ރާއްޖެއަށް މުހިންމު ބަދަލުތަކެއް ގެނެސްދޭނެ ކަމެއް ކަމަށެވެ. އަދި ދަނޑުވެރިކަމުގެ ދާއިރާއިން ލިބޭ އިލްމާއި ތަޖުރިބާގެ އަލީގައި، ރާއްޖެއިން ބޭރުން ގެންނަ އިމްޕޯޓް މުދަލަށް ބަރޯސާވާ މިންވަރު ކުޑަކުރެވޭނެކަން ފާހަގަކުރެއްވިއެވެ. "ޒަމާނީ ދަނޑުވެރިކަމަކީ ހަމައެކަނި އިހްތިޔާރީ ކަމެއް ނޫން ކަމަށާއި އެއީ ގައުމީ ފެންވަރުގައި އިސްކަންދޭންޖެހޭ އަސާސީ ދާއިރާއެއް ކަމަށް." ވެސް މިނިސްޓަރު ވިދާޅުވިއެވެ.
ރައީސް ޑރ. މުހައްމަދު މުއިއްޒުގެ ލަފާފުޅާ އެކު އެގްރިކަލްޗަ އެންޑް އެނިމަލް ވެލްފެއަ މިނިސްޓްރީން އަންނަނީ މިފަދަ ތަމްރީން ޕްރޮގްރާމްތައް ފުޅާކޮށް، ޒަމާނީ ފަންނުވެރިކަން މި ދާއިރާއަށް ތައާރަފްކުރުމަށް މަސައްކަތް ކުރަމުންނެވެ. މި ޕްރޮގްރާމްތަކުގެ ސަބަބުން ގައުމީ އިގްތިސާދީ ލަނޑުދަނޑިތައް ހާސިލްވެ، ދަނޑުވެރިކަން ވިޔަފާރި އުސޫލުން ކުރިއެރުވުމަށް މަގުފަހިވެގެންދާނެ ކަމަށް މިނިސްޓްރީން ބުންޏެވެ.
