ލަންކާގައި ހުންނަ ރާއްޖޭގެ އެމްބަސީން މިއަދު ބުނީ އެގައުމުގައި މިވަގުތު ތިބި އެހެން ގައުމުތަކުގެ ރައްޔިތުންނަށް މި ހާލަތުގައި ނުފުރި ލަސްވުމާއި ގުޅިގެން ވިސާ ހަމަވުމުގެ މައްސަލަތައް ކުރިމަތިވަމުންދާތީ ލަންކާގެ އިމިގްރޭޝަނުން އެކަމުގައި ލުއިގޮތްތަކެއް ހަމަޖައްސާފައިވާ ކަމަށެވެ.
އެގޮތުން މިމަހުގެ 28 ވަނަ ދުވަސް އަދި އޭގެ ފުރަން ހަމަޖެހިފައިވާ މީހުންގެ ތެރެއިން މޫސުން ގޯސްވެ ފްލައިޓްތައް ކެންސަލް ކުރުމާއި ގުޅިގެން ނުފުރޭ މީހުންގެ ވިސާގެ ފީ އާއި ވިސާ ހަމަވެ އިތުރަށް މަޑުކުރަންޖެހޭ މުއްދަތުގައި އަރާ ޖޫރިމަނާ ފީތައް މާފުކުރުމަށް ލަންކާގެ އިމިގްރޭޝަނުން ނިންމާފައިވާ ކަމަށް އެމްބަސީން ވަނީ ބުނެފަ އެވެ.
މީގެ އިތުރުން ކުރު މުއްދަތަކަށް ދަތުރުކުރާ ފަތުރުވެރިންނާއި ބިޒްނަސް ވިސާއާއި ރެސިޑެންސް ވިސާ ފުރިހަމަ ކުރުމަށް ހަތް ދުވަހުގެ މުހުލަތެއް ދިނުމަށްވެސް ލަންކާގެ އިމިގްރޭޝަނުން ނިންމާފައިވާ ކަމަށާއި އޮންލައިންކޮށް މި ހިދުމަތަށް އެދެވޭނެ ކަމަށް އެމްބަސީން ބުނެފައިވެ އެވެ.
ކުރު މުއްދަތުގެ ޓޫރިސްޓް ވިސާގެ މުއްދަތު، އޮންލައިން ޕޯޓަލް މެދުވެރިކޮށް އިތުރުކުރެވޭނެ ކަމަށް ބަޔާނުގައި ބުނެފައިވެއެވެ. އަދި އިތުރު އެހީތެރިކަން ބޭނުންނަމަ، ހައި ކޮމިޝަންގެ ހޮޓްލައިން 6666 881 76 94+ އަށް ގުޅުމަށް ނުވަތަ އެ ކޮމިޝަނަށް އީމެއިލް ކުރުމަށް ލަންކާ ހައި ކޮމިޝަނުން އެދިފައިވެއެވެ.
ލަންކާ ހައި ކޮމިޝަނުން ވަނީ އެ ކާރިސާގެ ހާލަތު ގާތުން ބަލަމުން އަންނަ ކަމަށާއި، އެންމެ ފަހުގެ އަދާހަމަތައް ފޯރުކޮށްދެމުން ގެންދާނެ ކަމަށް ވެސް ބުނެފަ އެވެ.
އާންމު ދިރިއުޅުމަށް އަސަރު ކުރުމުގެ ސަބަބުން ލަންކާ ސަރުކާރުން ވަނީ އެ ގައުމުގެ ސްކޫލްތަކާއި އޮފީސްތައް ވެސް ބަންދުކޮށްފަ އެވެ. އޭގެއިތުރުން ޓްރެއިން ސްޓޭޝަންތައް ވެސް ވަނީ ބަންދުކޮށްފަ އެވެ.
ލަންކާގެ އިދާރާތަކާ ހަވާލާދީ އަލްޖަޒީރާއިން ބުނީ މިދިޔަ ހަފްތާއިން ފެށިގެން ލަންކާގެ މޫސުން ގޯސްވެ ކުރަމުންދާ ވިއްސާރައިގައި މިހާތަނަށް 136 މީހުން މަރުވެ 600 އަށްވުރެ ގިނަ ގެއަށް ގެއްލުންތަކެއް ލިބި، ބައެއް މީހުން ގެއްލިގެން ހޯދަމުންދާ ކަމަށެވެ.
ވިއްސާރައިގެ ސަބަބުން ލަންކާއަށް ބޮޑެތި ގެއްލުންތަކެއް ދަނީ ލިބެމުންނެވެ. އެގޮތުން ގެތަކުގެ އިތުރުން ދަނޑުބިންތަކާއި މަގުތައް ވެސް ދަނީ ހަލާކުވަމުންނެވެ.
ލަންކާއަށް ކުރަމުންދާ ވިއްސާރައިގައި ފެންބޮޑުވެ ބައެއް ކޯރުތައް ވެސް ވަނީ ބަންޑުންވެފަ އެވެ. އޭގެ ސަބަބުން މަގުތައް ބްލޮކްވެ މީހުން ސަލާމަތް ކުރުމަށް ވެސް ދަނީ ދަތިތައް ކުރިމަތިވަމުންނެވެ.
